ab hava.en hi karengi raushni ka faisla — Mahshar Badayuni

main itni raushni phaila chuka huun
ki bujh bhi ja.un to ab gham nahin hai

— Mahshar Badayuni

ham ko bhi khush-numa nazar aa.i hai zindagi
jaise sarab duur se dariya dikha.i de

— Mahshar Badayuni

jis ke liye bachcha roya tha aur ponchhe the aansu baaba ne
vo bachcha ab bhi zinda hai vo mahnga khilauna TuuT gaya

— Mahshar Badayuni

har patti bojhal ho ke giri sab shakhen jhuk kar TuuT ga.iin
us barish hi se fasl ujDi jis barish se tayyar hui

— Mahshar Badayuni

abhi sar ka lahu thamne na paaya
udhar se ek patthar aur aaya

— Mahshar Badayuni

kare dariya na pul mismar mere
abhi kuchh log hain us paar mere

— Mahshar Badayuni