Shayari Of Abdul Aziz Khalid

"us chashm-e-mai-gusār kī āhista naġhmagī phir sho.ala-āfrīñ nazar aatī hai zindagī us shoḳh kī nigāh meñ āyāt-e-ḳhamriyāt shān-e-rubūdgī meñ adā-e-supurdagī phir aam ho ga.iiñ tire jalvoñ kī nik.hateñ naġhma-tarāz hai tire qāmat kī nāzukī ye aur baat hai ki mirā dil udaas hai ab bhī javāñ hai us qad-e-ra.anā kī dilbarī tū dil-girafta kyoñ hai abhī rahguzār meñ baaqī hai naqsh-e-pā kī shafaq-rang raushnī garche charāġh-e-mimbar-o-mehrāb bujh ga.e hotā hai phir bhī dil meñ charāġhāñ kabhī kabhī"

"phūlī hai shafaq go ki abhī shaam nahīñ hai hai dil meñ vo ġham jis kā koī naam nahīñ hai kis ko nahīñ kotāhī-e-qismat kī shikāyat kis ko gila-e-gardish-e-ayyām nahīñ hai aflāk ke saa.e tale aisā bhī hai koī jo said-e-zabūñ māya-e-ālām nahīñ hai chhilkoñ ke haiñ ambār magar maġhz nadārat duniyā meñ musalmāñ to haiñ islām nahīñ hai īmāñ nahīñ momin kā mukāfāt-e-amal par ummīd-e-karam kyā tama-e-ḳhām nahīñ hai masjid ho ḳharābāt ho yā kū-e-butāñ ho is qalb-e-tapāñ ko kahīñ ārām nahīñ hai ai māh-visho lāla-ruḳho vasl kī ham ko ḳhvāhish to hai be-shak magar ibrām nahīñ hai kaifī haiñ mai-e-nāb-e-ḳhum-e-mehr-shuda ke ham ko talab-e-durd-e-tah-e-jām nahīñ hai lafzoñ ke dar-o-bast pe har-chand ho qādir shā.er nahīñ jo sāhab-e-ilhām nahīñ hai har baat hai 'ḳhālid' meñ pasandīda o matbū ik pairvī-e-rasm-o-rah-e-ām nahīñ hai"

"phir tire āstāñ pe le aa.ī khīñch kar lazzat-e-jabīñ-sā.ī pesh-o-pas ko bahā.e jaatā hai terā sailāb-e-rang-o-ra.anā.ī koī bekas duā.eñ detā hai vo tirī pursish-o-pazīrā.ī phir se betāb hai dil-e-shaidā kisī bhūle hue kī yaad aa.ī ek parda hai ḳhud-farebī kā ye mirā zauq-e-naġhma-pairā.ī matla.a-e-sub.h-e-nau-bahār bane us mujassam hayā kī paidā.ī nazar ehsās-e-husn se maḳhmūr lāl-e-ḳhush-āb meñ masīhā.ī dīdanī hai adā-e-mahbūbī saare andāz haiñ zuleḳhā.ī āfat-e-aql-o-hosh hai 'ḳhālid' us parī-rū kā husn-e-sahrā.ī"

"taqāzā-e-dil-o-jāñ kā kahīñ darmāñ nahīñ miltā dayār-e-dard meñ taskīn kā sāmāñ nahīñ miltā ḳhirāminda haiñ maiḳhāne agarche terī āñkhoñ meñ yahāñ se bhī mudāvā-e-ġham-e-pinhāñ nahīñ miltā tirī chashm-e-tamāshā-mast meñ ġhaltāñ haiñ afsāne magar tamhīd-e-ulfat kā koī unvāñ nahīñ miltā kisī shai kī kamī hai tere jalvoñ kī navāzish meñ ki ab vo vālehāna-pan vo zauq-e-jāñ nahīñ miltā tire andāz kī ġhārat-garī bhī kyā qayāmat hai ki naqd-e-zindagī-o-gauhar-e-īmāñ nahīñ miltā kamāl-e-iffat-e-qalb-o-nazar mafqūd hai 'ḳhālid' ye rutba mil to jaatā hai magar āsāñ nahīñ miltā"

"maiñ baat kaun se pairāya-e-bayāñ meñ karūñ jo sochtā huuñ use kis zabān meñ likhūñ katar diye haiñ zamāne ne pankh ḳhvāboñ ke bharā hai sāġhar-e-hasrat meñ ārzūoñ kā ḳhuuñ nahīñ hai kushta-e-ḳhūbāñ kā ḳhūñ-bahā koī ai ahl-e-shauq na khaao fareb harf-e-fusūñ kabhī hai chāñd kā haala naqāb-e-lāla kabhī anīle rang dikhātī hai zulf-e-ġhāliya-gūñ zamām-e-rāhila-e-dil ḳhirad ke haath meñ do ki mārtī hai havas is navāh meñ shab-ḳhūñ ab is ko ḳhāna-ḳharābī kaho ki māmūrī zamīñ meñ saath ḳhazāne ke dhañs gayā qārūñ banū-tamīm ho tum maiñ salāma-bin-jindal bilā-javāz tumhārī sanā maiñ kaise karūñ parindgān-e-bayābāñ kareñ vasīla jise maiñ us amiin ke ḳhirman ke ḳhosha-chīnoñ meñ huuñ shahīd-e-ilm bhī huuñ zinda-e-mohabbat bhī ba-faiz-e-zauq-e-salīm-o-tabī.at-e-mauzūñ sharīk-e-zumra-e-mehnat-kashāñ hai shā'ir bhī bahā-e-sad-nafas-e-ḳhūñ-chakāñ hai ik mazmūñ anāḌī-pan na kaho merī sāda-lauhī ko huuñ nau-niyāz magar kuhna-mashq-e-jazb-o-junūñ balā-e-jabr bhī hai pā-e-iḳhtiyār bhī hai qusūr-vār huuñ maiñ yā sadā-e-kun-fayakūñ darā-e-farra-e-farhañg dekho rang-e-suḳhan abul-kalām nahīñ maiñ abul-ma.ānī huuñ"

"bū-e-nasīm se kabhī bād-e-shimāl se kasb-e-nashāt kartā huuñ tere jamāl se jāñ-dāda-e-latāfat-e-zikr-e-habīb ko raġhbat nahīñ fasāna-e-jāh-o-jalāl se us husn-e-be-hijāb kī shādābiyāñ na pūchh goyā ki be-niyāz hai fikr-e-ma.āl se ye aish kaash ishrat-e-jāved ho sake pahlū meñ dil dhaḌaktā hai ḳhauf-e-zavāl se jal uThte haiñ hasīn diye ārzūoñ ke aivān-e-ġham meñ aaj bhī tere ḳhayāl se gah gah miTātā huuñ ġham-e-daurāñ kī talḳhiyāñ yāqūt-rang hoñToñ ke āb-e-zulāl se mahtāb-vash nikhartī haiñ afsurda shoḳhiyāñ us chehra-e-sabīh pe aks-e-malāl se"

"hoñ kyuuñ na munkashif asrār past-o-bālā ke jame haiñ paañv zamīñ par sar āsmāñ ko chhue jo sarnavisht meñ hai us ko ho ke rahnā hai to kis bharose pe insān jidd-o-jahd kare ab āsmāñ se sahīfe nahīñ utarte magar khulā huā hai dar-e-ijtihād sab ke liye zabāñ atā kare sher un kī be-zabānī ko jo apne karb kā iz.hār kar nahīñ sakte bahār-o-bahjat-o-izz-o-vaqār us pe nisār zabāñ se maal se jaañ se jo zālimoñ se laḌe hai āñsuoñ meñ shifā kaisī kyā ḳhabar us ko bahā.e makr se jo jhūT-mūT ke Tasve hai bas-ki kaam ham aisoñ kā bhī masīhā.ī ham āsmān pe zinda uThā.e jā.eñge"

"vahī andāz-e-jahān-e-guzarāñ hai ki jo thā in nigāhoñ se vahī raaz ayaañ hai ki jo thā vahī rindoñ kī siyah-noshī-e-durd-e-tah-e-jām vahī nazzāra sar-e-kū-e-muġhāñ hai ki jo thā haa.e us kaif-e-nuḳhustīñ kī ḳhumār-angezī tirī āñkhoñ meñ vahī ḳhvāb javāñ hai ki jo thā vahī tarġhīb-e-tamanna kī chaman-ārā.ī aur pahlū meñ vahī qalb-e-tapāñ hai ki jo thā lazzat-e-shauq kā anfās meñ nam baaqī hai mire siine meñ vahī soz-e-nihāñ hai ki jo thā inqilābāt abhī gardish-e-ayyām meñ haiñ tire jalvoñ meñ vahī sahr-e-ravāñ hai ki jo thā zauq-e-vārafta kī asnām-garī miT na sakī hā.il-e-rāh vahī sang-e-girāñ hai ki jo thā vahī āshufta-nigāhī vahī sahrā-talabī vahī ik ma.arka-e-sūd-o-ziyāñ hai ki jo thā"

"qazā se qarz kis mushkil se lī umr-e-baqā ham ne matā-e-zindagī de kar kiyā ye qarz adā ham ne hameñ kis ḳhvāb se lalchā.egī ye pur-fusūñ duniyā khurach Daalā hai lauh-e-dil se harf-e-mudda.ā ham ne kareñ lab ko na ālūda kabhī harf-e-shikāyat se shi.ār apnā banāyā sheva-e-sabr-o-razā ham ne ham us ke haiñ sarāpā adbadā kar us se kyā māñgeñ uThāyā hai kabhī ai mudda.ī dast-e-duā ham ne shahīdān-e-vafā kī manqabat likhte rahe lekin na kī arzī ḳhudāoñ kī kabhī hamd-o-sanā ham ne parakhne vaale parkheñge isī me.aar par ham ko jahāñ se kyā liyā ham ne jahāñ ko kyā diyā ham ne vahī insāñ jahāñ jaao vahī hirmāñ jidhar dekho bapā-e-ḳhufta kī sayyāhī-e-mulk-e-ḳhudā ham ne luTā zauq-e-safar bhī kārvāñ kā aise lagtā hai sunā har taaza pesh-āhañg kā shor-e-darā ham ne sitam-ārāo sun lo āḳhirī bardāsht kī had tak sahā har nā-ravā ham ne sunā har nā-sazā ham ne ye duzdīda nigāheñ haiñ ki dil lene kī rāheñ haiñ hamesha dīda-o-dānista khaa.ī hai ḳhatā ham ne kashākash ham se pūchhe koī nā-āsūda ḳhvāhish kī hasīnoñ se bahut bāñdhe haiñ paimān-e-vafā ham ne kiyā takmīl-e-naqsh-e-nā-tamām-e-shauq kī ḳhātir jau tum se ho sakā tum ne jau ham se ho sakā ham ne 'irāqī' kī tarah 'ḳhālid' ko kyuuñ badnām karte haiñ na dekhā koī aisā ḳhush-navاa-e-benavā ham ne"

"fat.h kitnī ḳhūb-sūrat hai magar kitnī garāñ bārhā rad kī hai maiñ ne dāvat-e-vasl-e-butāñ naġhma-e-bulbul hai faryād-e-vidā-e-fasl-e-gul sa.ī-e-hāsil dar-haqīqat hai matā-e-rā.egāñ zinda rahne ke haiñ imkānāt kyā āsār kyā kaun sī qadreñ haiñ baaqī kaun sī sachchā.iyāñ shā'iroñ kā kaam kyā tansīq-e-ausāf-o-luġhūt yā sanā shāhoñ kī yā mad.h-e-sarāpā-e-butāñ zahr hai fan ke liye darbār-dārī kā mizāj kam-tarīn-e-shart-e-goyā.ī hai iḳhlās-e-bayāñ tere hāthoñ par lagā hai be-gunāhoñ kā lahū jām-e-jam meñ mai nahīñ ḳhūn-e-siyādish hai muġhāñ maiñ to piitā huuñ faqat gulnār hoñToñ kī sharāb sabbeh-ism-e-rabbekal-ālā rahe vird-e-zabāñ ḳhatm haiñ is shoḳh rā.anā par tarah-dārī ke rang qadd-e-bālā jis kā hai rashk-e-qazīb-e-ḳhaizrāñ jhanjhanā uThne ko haiñ betāb tan biinā ke taar kaun laa.e taab husn-e-be-hijāb-e-mah-vashāñ be-niyāz-e-harf hai guftār-e-chashm-e-pur-suḳhan darmiyān-e-mahramān-e-jāñ hai nā-mahram zabāñ koī tanhā.ī kā gosha koī kunj-e-āfiyat 'āshiq-o-mā'shūq yakjā hoñ kahāñ ai āsmāñ ai muhibbo rāh-e-ulfat meñ har ik shai hai mubāh kis ne khīñchā hai ḳhat-e-hijrāñ tumhāre darmiyāñ titliyāñ dekhī haiñ baiThī ḳhushk phūloñ par kabhī hājateñ apnī karo tum ḳhūb-rūoñ se bayāñ ham ne nīñdeñ de ke rātoñ se ḳharīde ratjage ham se kam hoñge ukāz-e-dahr meñ bāzārgāñ rāt-din sunte haiñ tasvīlāt-e-arbāb-e-hasad ehtiyāj-e-dushmanāñ bhī hai hunar ko be-gumāñ jaane kin auqāt meñ likhtā thā qānūn-o-shifā bū-alī-sīnā vo maqtūl-e-muġhāñ sheva-butāñ maut se vahshat hai logoñ ko mohabbat maal se bāñg-e-be-hañgām hai kūs-e-rahīl-e-kārvāñ hai qarīb ai shab zarā sub.h-e-qayāmat kā tulūa TūTne ko hai azal-tābāñ tanāb-e-kahkashāñ tum akele aa.e duniyā meñ akele jāoge zindagī ik pal hai kyā pul par banāte ho makāñ ḳhizr zinda hai magar zindānī-e-umr-e-abad ai ajal kis kaam kī aisī hayāt-e-jāvidāñ maiñ bhī huuñ mānind māmūñ ke amīr-ul-kāfrīñ bas-ki huuñ vārafta-e-fikr-o-fan-e-yūnāniyāñ hai sulaimāñ kī taraf vāqif lisān-uttair se shā.ir-e-zohra-nigāhāñ ḳhālid-e-uqda-zabāñ go harīm-e-āgahī kī shakl bhī dekhī nahīñ hai ba-zom-e-ḳhvesh dānā-e-rumūz-e-kun-fakāñ"

"naḳhchīr huuñ maiñ kashmakash-e-fikr-o-nazar kā haq mujh se adā ho na dar-o-bast-e-hunar kā maġhrib mujhe khīñche hai to roke mujhe mashriq dhobī kā vo kuttā huuñ ki jo ghaaT na ghar kā dabtā huuñ kisī se na dabātā huuñ kisī ko qaa.el huuñ musāvāt-e-banī-nau-e-bashar kā har chiiz kī hotī hai koī āḳhirī had bhī kyā koī bigāḌegā kisī ḳhāk-basar kā dil-gīr to be-shak huuñ pe naumīd nahīñ huuñ raushan hai dil-e-shab meñ diyā nūr-e-sahar kā poshīda nahīñ mujh se koī jazr-o-mad-e-shauq mahram huuñ sadā dilbar-e-añgeḳhta-bar kā zindāñ o salāsil se sadāqat nahīñ dabtī hai shān-e-ka.ī silsila bas raqs-e-sharar kā tasvīr koī bantī dikhā.ī nahīñ detī kiyā sarfa abas ham ne kiyā ḳhūn-e-jigar kā kyā shuġhl-e-shajar kaar hai afkār se behtar saudā sar-e-shorīda meñ gar ho na samar kā kyuuñ sar-ḳhush-e-raftār na ho ho qāfila-e-mauj rahzan kā hai andesha na ġham zād-e-safar kā Daalī hai sitāroñ pe kamand ahl-e-zamīñ ne zohra kā vo afsūñ na fasāna vo qamar kā har baat hai 'ḳhālid' kī zamāne se nirālī bāshinda hai shāyad kisī duniyā-e-digar kā"

"bhūloñ unheñ kaise kaise kaise vo lamhe jo tere saath guzre hai rāh-numā jibillat un kī be-his nahīñ mausamī parinde ai dānish-var mafar nahīñ hai iqrār-e-vajūd-e-kibriyā se jaanā koī kārsāz bhī hai TuuTe ban ban ke jab irāde mehrāb umuud burj qauseñ ras meñ Duube bhare bhare se bahr-e-kāfūr meñ talātum bhoñrā baiThā kañval ko chūse chāk-e-ufqī harīm-e-zohra rah rah ke madan tarañg jhalke jhilmil jhilmil badan kā sonā lahrā.eñ laTeñ kamar se nīche kyā chāñd sī sūrateñ banā.īñ qurbān ai niilī chhatrī vaale"