خاک پر نیند میسر بھی تو ہو سکتی ہے وحشت دشت مرے ساتھ میں سو سکتی ہے آشنا ہے وہ مری مٹی کی زرخیزی سے وہ مرے جسم پہ اب زخم بھی بو سکتی ہے تھام لے ہاتھ مرا مجھ سے کنارہ مت کر ورنہ اس بار تو سچ مچ مجھے کھو سکتی ہے دے نہیں سکتے دلاسہ در و دیوار تجھے دیکھ تو مجھ سے لپٹ کر بھی تو رو سکتی ہے اشک ہی آنکھ سے ٹپکیں یہ ضروری تو نہیں اوس بھی تو مرے دامن کو بھگو سکتی ہے زندگی تجھ کو تو آتی ہے کشیدہ کاری کیا مرے سر کو بھی نیزے میں پرو سکتی ہے فکر بوڑھی تو بہت ہے مری لیکن اب بھی بوجھ الفاظ کا آسانی سے ڈھو سکتی ہے

غزل · Ghazal

is se pahle ki bichhaDne kaa iraada kar lein

اس سے پہلے کہ بچھڑنے کا ارادہ کر لیں آؤ ہم ذکر محبت کا زیادہ کر لیں بن پئے بھی تو شب ہجر گزر سکتی ہے کیا ضروری ہے کہ سر تہمت بادہ کر لیں یہ بھی ہو سکتا ہے وہ خود میں سمٹ کر آئیں ہم بھی ممکن ہے کہ آغوش کشادہ کر لیں ہم کو ملبوس سکونت تو نہیں ہوگا نصیب راستے کی ہی تھکن تن کا لبادہ کر لیں ہم فقیروں کو جہاں والوں نے سمجھا کیا ہے بادشاہوں کو بھی چاہیں تو پیادہ کر لیں مجھ کو اس ہاتھ پہ دل رکھنا تھا میں رکھ آیا اب وہ چاہیں تو مرے دل کا برادہ کر لیں

Similar Poets