Ameer Chand Bahar

vo be-khud-e-shabaab vo simin-badan kahaan

وہ بیخود شباب وہ سیمیں بدن کہاں میں غم نصیب کشتۂ رنج و محن کہاں دل میں کسی کی یاد نے پھر لی ہیں چٹکیاں آنکھوں میں چھپ گیا ہے وہ غنچہ دہن کہاں دنیائے رنگ و بو میں اسی کا تھا اہتمام وہ گل بدن نہیں تو بہار چمن کہاں آرام آ چکا ہے دل بے قرار کو اگلی سی وہ خلش وہ کسک وہ چبھن کہاں فکر معاش نے ہمیں سب کچھ بھلا دیا اب وہ بساط عیش وہ بزم سخن کہاں مرتے ہیں اب بھی بادہ و شاہد کے نام پر اہل وطن میں جذبۂ حب وطن کہاں سارا جہان اپنا وطن اب تو ہے بہارؔ کیوں مجھ سے پوچھیے کہ ہے میرا وطن کہاں

gham-e-hayaat ki aakhir koi davaa bhi hai

غم حیات کی آخر کوئی دوا بھی ہے فرار کا کوئی دنیا میں راستا بھی ہے ہم اٹھ تو جائیں تری بزم ناز سے لیکن ترے بغیر کوئی اپنا آسرا بھی ہے تری نگاہ میں ٹھنڈک ہے چاندنی کی سی یہ دل فریب بھی ہے اور دل ربا بھی ہے بہت ستایا ہوا ہوں میں جس ستم گر کا اسی کا شام و سحر لب پہ تذکرہ بھی ہے کسی غریب کی سنتا ہے کب کوئی فریاد غریب کو کوئی دنیا میں پوچھتا بھی ہے کسی کی مدھ بھری نظروں کے جام پیتا ہے بہارؔ رند بھی ہے اور پارسا بھی ہے

ye kaif-e-husn us pe ye masti shabaab ki

یہ کیف حسن اس پہ یہ مستی شباب کی یہ آپ ہیں کہ موج ہے کوئی شراب کی سونی ہے بزم عالم امکاں ترے بغیر ظلمت ہے روشنی بھی شب ماہتاب کی کیوں میری لغزشوں پہ زمانہ ہے طعنہ زن سب لغزشیں معاف ہیں عہد شباب کی ذوق سلیم چاہئے شاعر کے واسطے حاجت ہے مے کشی کی نہ فن پر کتاب کی وہ سرد سرد آہیں وہ اختر شماریاں دلچسپیاں تھیں یہ مرے عہد شباب کی جذبات حسن و عشق سے لبریز یہ غزل تصویر ہے کسی دل خانہ خراب کی کیف آفریں ہے میرا غم عشق اے بہارؔ لذت نہ مجھ سے پوچھ تو ایسے عذاب کی

na hamdam hai na koi ham-zabaan hai

نہ ہمدم ہے نہ کوئی ہم زباں ہے دل ناشاد پھر بھی نغمہ خواں ہے مری قسمت میں ہی دی ہے خدا نے مصیبت جو بھی زیر آسماں ہے چمن کے طائرو اب خیر مانگو بہت برہم مزاج باغباں ہے ہوا رخصت شباب اے ہم صفیرو طبیعت میں وہ شوخی اب کہاں ہے مجھے بخشی ہے جس نے غم کی دولت اسے کیوں کر کہوں نا مہرباں ہے گھڑی بھر ہی کی لذت ہے ہوس میں محبت ایک کیف جاوداں ہے دل ناداں کو بہلاتی رہی جو مرے خوابوں کی وہ دنیا کہاں ہے مٹائے گا کوئی اردو کو کیوں کر یہ اقبالؔ اور غالبؔ کی زباں ہے بہارؔ اہل زمانہ کو خوشامد ہماری طبع نازک پر گراں ہے

ishq mein zabt-e-fughaan darkaar hai

عشق میں ضبط فغاں درکار ہے بے زبانی کی زباں درکار ہے دیر و کعبہ سے نہیں کوئی غرض مجھ کو تیرا آستاں درکار ہے وحشت دل کا ہو کوئی تو علاج صحبت پیر مغاں درکار ہے میرے دل کی سمت وہ نظریں اٹھیں بجلیوں کو آشیاں درکار ہے شوق سے آ کر مرے دل میں رہیں آپ کو خالی مکاں درکار ہے ان گھنی زلفوں کا سایہ کیجئے دھوپ میں اک سائباں درکار ہے میں اسی دنیا کو کہتا ہوں بہشت شیخ کو باغ جناں درکار ہے واردات قلب ہے مجھ کو عزیز آپ کو حسن بیاں درکار ہے راز دل کس پر کروں میں آشکار کوئی دل کا راز داں درکار ہے نا شناسان ادب میرے حریف صحبت دانش وراں درکار ہے زندگی سے ہو گیا ہے دل اچاٹ پھر حدیث دلبراں درکار ہے حاسدوں میں گھر گیا ہوں اے بہارؔ فکر و فن کا قدرداں درکار ہے

palTeinge rukh apnaa kab ye maah ye saal aakhir

پلٹیں گے رخ اپنا کب یہ ماہ یہ سال آخر کب تک ہمیں رہنا ہے یوں غم سے نڈھال آخر کیا حد سے گزرنا یہ اے مست کمال آخر ہر چیز کو دنیا میں لازم ہے زوال آخر وہ سطو قیصر ہو یا حشمت اسکندر مل جاتا ہے مٹی میں سب جاہ و جلال آخر میں تجھ کو بتاتا ہوں کیا عشق میں ہوتا ہے ارمان و طلب اول اندوہ و ملال آخر یہ عشق جسے تو نے اک مشغلہ سمجھا ہے کر دے گا ترا جینا خود تجھ پہ محال آخر محرومی و ناکامی دل سوزی و جاں کاہی ہوتا ہے محبت کا اکثر یہ مآل آخر مجھ سوختہ ساماں کے پہلوئے محبت میں آیا ہے غزل بن کر وہ زہرہ جمال آخر قسمت کو جگانے میں غفلت کو ہٹانے میں بن جائیں گے اک دن ہم آپ اپنی مثال آخر زیب ورق دل ہے یہ قول بہارؔ اپنا تکمیل ریاض اول تحصیل کمال آخر