Hafeez Jaunpuri

pi kar do ghunT dekh zahid
kya tujh se kahun sharab kya hai

zahid ko raT lagi hai sharab-e-tuhur ki
aaya hai mai-kade men to sujhi hai duur ki

bura hi kya hai baratna purani rasmon ka
kabhi sharab ka piina bhi kya halal na tha

pahunche us ko salam mera
bhule se na le jo naam mera

the chor mai-kade ke masjid ke rahne vaale
mai se bhara hua hai jo zarf hai vazu ka

vo mana.ega jis se ruThe ho
ham ko minnat se ajizi se gharaz

is ko samjho na khatt-e-nafs 'hafiz'
aur hi kuchh hai shaaeri se gharaz

jo divaanon ne paimaaish ki hai maidaan-e-qayaamat ki
faqat do gaz zamin Thahri vo mere dasht-e-vahshat ki

o aankh badal ke jaane vaale
kuchh dhyaan kisi ki aajizi kaa

pari thi koi chhalaavaa thi yaa javaani thi
kahaan ye ho gai champat jhalak dikhaa ke mujhe

kabhi masjid mein jo vaaiz kaa bayaan suntaa huun
yaad aati hai mujhe pir-e-kharaabaat ki baat

bahut duur to kuchh nahin ghar miraa
chale aao ik din Tahalte hue