Saleem Ahmed

dil husn ko daan de raha huun
gahak ko dukan de raha huun

haal mat puchh mohabbat ka hava hai kuchh aur
la ke kis ne ye sar-e-rah diya rakkha hai

dar-ba-dar Thokaren kha.in to ye malum hua
ghar kise kahte hain kya chiiz hai be-ghar hona

ghaas men jazb hue honge zamin ke aansu
paanv rakhta huun to halki si nami lagti hai

na jaane sher men kis dard ka havala tha
ki jo bhi lafz tha vo dil dukhane vaala tha

main tujh ko kitna chahta huun
ye kahna ghair-zaruri hai

ye nahin hai ki navaaze na gae hon ham log
ham ko sarkaar se tamgha milaa rusvaai kaa

main gham ko basaa rahaa huun dil mein
be-ghar ko makaan de rahaa huun

ghar mein kuchh kam hai ye ehsaas bhi hotaa hai 'salim'
ye bhi khultaa nahin kis shai ki kami lagti hai

jaane andar kyaa huaa main shor sun kar ai 'salim'
us jagah pahunchaa to dekhaa band vo darvaaza thaa

ik aag si jalti rahi taa-umr lahu mein
ham apne hi ehsaas mein pakte rahe taa-der

khush-numaa lafzon ki rishvat de ke raazi kijiye
ruuh ki tauhin par aamaada rahtaa hai badan