kah rahaa thaa kal ek divaana — Asif Banarsi

"paate hain apne ko ab tak lutf se begaana ham ai haram vaale karein aabaad kyaa but-khaana ham mere divaane kahaa thaa tu ne ik din naaz se ab tak apne ko samajhte hain tiraa divaana ham husn ko apne liye ik aaina darkaar thaa mahv-e-hairat the hue vaqf-e-rukh-e-jaanaana ham tum kaho to pher lein apni haqiqat se bhi aankh tum suno to chheD dein koi nayaa afsaana ham chaahte hain vo hamaari hi taraf maail rahe us ki bazm-e-naaz ko samjhe hain khalvat-khaana ham dekhein kyaa aae nazar khaakistar-e-parvaana mein dekhte hain shama mein soz-e-dil-e-parvaana ham vaqt Daalegaa hamaari bhi haqiqat par naqaab vo bhi din aaegaa jab ho jaaeinge afsaana ham lauTte kyaa tere maikhaane se be-nail-e-maraam mai na haath aai to gham se bhar chale paimaana ham jaa-ba-jaa aataa gayaa us ki navaazish kaa bayaan apne dil kaa der tak kahte rahe afsaana ham laDkhaDaataa dekh kar saaqi sahaare ko baDhaa aa qadam le lein tire ai laghzish-e-mastaana ham us kaa afsun-e-nazar hai apnaa unvaan-e-kalaam us ke afsun hi kaa 'aasif' kahte hain afsaana ham"

"shama kyon aane lagi mere siyah-khaane tak duur mujh sokhta-saamaan se hain parvaane tak hamein mahrum na rakh saaghar-e-mai se saaqi muddaton mein kabhi aa jaate hain maikhaane tak husn ne baandhaa hai naa-qaabil-e-taskhir tilism apne afsun-e-nazar se mire afsaane tak main to main huun dar-o-divaar bichhaaein aankhein kabhi tum aa ke to dekho mire kaashaane tak furqat-e-gul mein jo tu garm-e-fughaan hai bulbul aag lag jaae na gulshan mein bahaar aane tak chashm tar hoti hai jis vaqt pighaltaa hai dil baDi mushkil se ye mai aati hai paimaane tak shiddat-e-karb hai tamhid sukun ki lekin jaan par guzregi kyaa dil ko qaraar aane tak abhi aankhon hi ko de bazm mein gardish saaqi yahi paimaane chhalakte rahein jaam aane tak de na de saath miraa gardish-e-dauraan 'aasif' zinda rahnaa hai bahar-haal qazaa aane tak"

"yuun nikalti hai dil se aah kahin ho na ho laD gai nigaah kahin baDhti hi jaati hain tamannaaein dil ko kar dein na ye tabaah kahin dekh li main ne bhi jhalak un ki chukti hai miri nigaah kahin le ke dil tu ne to churaai aankh is tarah hoti hai nibaah kahin ham se aakhir vo munh chhupaane lage chhupti hai shauq ki nigaah kahin aql ne is mein TeDh paidaa ki nazar aai jo sidhi raah kahin zabt-e-girya kaa ehtimaam to hai na nikal jaae munh se aah kahin tere dar par jise amaan na mili us ko milti nahin panaah kahin dil ko aankhon ne kar diyaa gumraah ab ye hotaa hai ru baraah kahin ghair kaa ishq dil-lagi Thahraa ham se hotaa jo ye gunaah kahin kah na de un se haal-e-dil 'aasif' meri hasrat-bhari nigaah kahin"

"chaand apnaa safar khatm kartaa rahaa shama jalti rahi raat Dhalti rahi ham tiri raah chup-chaap dekhaa kiye ye kahaani isi tarah chalti rahi be-qaraari shab-e-hijr ki kyaa kahun yaad teri kalejaa masalti rahi chain dil se nigaahein churaataa rahaa niind aankhon mein karvaT badalti rahi taaqat-e-zabt ki koshishein ik taraf sard aahon kaa zor aur shor ik taraf aansu aankhon se ruk ruk ke bahte rahe barf jamti rahi aur pighalti rahi ham tiri yaad mein is tarah mahv the kuchh khabar hi na maahaul ki ho saki gham ki naagin kaleje pe baiThi hui munh se shoale pe shoale ugalti rahi uf re paas-e-mohabbat ki majburiyaan umr ummid hi mein basar ho gai subh hoti rahi shaam hoti rahi baat vaadon hi vaadon pe Talti rahi baavajude-ki makhfi kisi se na thaa kaar-gaah-e-jahaan jaae maandan nahin hukm-e-fitrat ki taamil hoti rahi saancha bantaa rahaa shakl Dhalti rahi hajv-e-mai mimbar-e-khisht-e-mai-khaana par us pe turra ye saaqi ke hote hue muft kaa shaghl rindon ke haath aa gayaa khuub vaaiz ki pagDi uchhalti rahi barq-e-hirmaan giri aur girti rahi baal biikaa na ummid kaa kar saki valvalon ke parakhche uDe ji bujhaa par tamanna ki qindil jalti rahi uf vo mubham se tevar uchaTti nazar ham doraahe pe vahm-o-yaqin ke rahe sham-e-umid turfa-tamaasha bani khud hi bujhti rahi khud hi jalti rahi vo mohabbat ki sahbaa-e-do-aatisha mere ham-mashrabo mai-kade mein kahaan un nigaahon kaa kaif-e-shabaana liye khalvat-e-be-khalal mein jo Dhalti rahi ghuncha-o-gul kaa jab tak zamaana rahaa 'aasif' apni tabiat rahi josh par kaif-e-ishrat fazaa se Tapaktaa rahaa aish ki mai zamin se ubalti rahi"

"muktafi sajda-e-niyaaz nahin itni arzaan nigaah-e-naaz nahin naghma soz-e-darun kaa aaina soz-e-dil be-niyaaz-e-saaz nahin mai-kada baavajud-e-kaif-o-surur aap ki chashm-e-nim-baaz nahin zer-e-mashq-e-zamaana hain vo log fitratan jo zamaana-saaz nahin kyon haqiqat ki hai talaash hamein be-haqiqat agar majaaz nahin dil ki aavaaz dil hi suntaa hai mahram-e-soz naghma-saaz nahin kaam apne khudaa ko saunp 'aasif' koi us jaisaa kaarsaaz nahin"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"