Ghazal

baam par aaj na mahtaab-e-darakhshaan niklaa

ham rahe diid se mahrum kab armaan niklaa

bazm mein sirf na the ahl-e-nazar hi shashdar

dekh kar un ko to aaina bhi hairaan niklaa

· · ·

ain laazim hai tabaddul kaa numaayaan honaa

aaina dekh rahaa hai miraa hairaan honaa

dekh phir un ke taghaaful ki chali purvaai

ai mire zakhm-e-jigar aur darakhshaan honaa

· · ·

tum jo chaaho hansi-khushi rahnaa

shahr mein apne ajnabi rahnaa

jaane kab us ki yaad aa jaae

zehn ki khiDkiyo khuli rahnaa

· · ·

ba-qadr-e-zarf sab ne apne e'tibaar chun liye

khirad ne phuul le liye junun ne khaar chun liye

huaa madina-e-yaqin us kaa rashk-e-gulsitaan

vo jis ne rif’at-e-yaqin ke regzaar chun liye

· · ·

paas jab vo sitam-ijaad aaya

kuchh bhi us dam na hamein yaad aaya

rukh masarrat kaa na dekhaa ham ne

le ke har pal nai uftaad aaya

· · ·

har ek lafz ko shaffaaf aaina kar duun

main tere husn kaa manzum tarjuma kar duun

zabaan-e-she’r mein tashbih isti’aaron se

ba-har jamaal tujhe ik misaaliya kar duun

· · ·

dil hai adaa-shanaas nazar pairahan-shanaas

kah duun main raaz-e-dil vo agar hon sukhan-shanaas

muzhda hain fasl-e-gul kaa tiri aah-o-zaariyaan

ai taair-e-asir bahaar-e-chaman-shanaas

· · ·

baaghbaan jashn-e-bahaaraan nahin hone dete

diip ulfat ke farozaan nahin hone dete

zahr ulfat kaa pilaate hain baDe fakhr ke saath

aap insaan ko insaan nahin hone dete

· · ·

nai havaa mein koi rang-e-kaaenaat mein gum

huaa hai saaraa zamaana tasannuaat mein gum

gale kaa haar kahin ban na jaae mahrumi

na honaa bhuul ke husn-e-takallufaat mein gum

· · ·

numaayaan jab vo apne zehn ki tasvir kartaa hai

har ik ahl-e-mohabbat ko bahut dil-gir kartaa hai

vo kyuun masrur hotaa hai hamaaraa khuun bahne se

sar-e-haq kis liye zaalim tah-e-shamshir kartaa hai

· · ·

vasvase dil mein na rakh khauf-e-rasan le ke na chal

azm-e-manzil hai to ham-raah thakan le ke na chal

raah-e-manzil mein bahar-haal tabassum farmaa

har qadam dukh sahi maathe pe shikan le ke na chal

· · ·

dil-o-jaan sadqe hote kabhi dil nisaar hotaa

tumhein ham gale lagaate agar ikhtiyaar hotaa

unhein sochtaa main dil se to ghazal ke phuul khilte

jo zabaan pe harf aataa gul-e-mushk-baar hotaa

· · ·

'ataa-e-barq kaa muddat se jo nishaana hai

hai fakhr mujh ko vo meraa hi aashiyaana hai

jo bah rahaa hai gulistaan mein hai lahu meraa

jo jal rahaa hai vo meraa hi aashiyaana hai

· · ·

lailaa nahin to manzar-e-mahmil nahin rahaa

majnun bhi aaj 'ishq ke qaabil nahin rahaa

dil ko kisi ke baandhne qaabil nahin rahaa

dam-kham vo tujh mein kaakul-e-qaatil nahin rahaa

· · ·

us ke hasin rukh pe 'ajab rang-o-nur thaa

kuchh bhi kaho vo saahab-e-imaan zarur thaa

ik mohtaram ne sab ko kiyaa vaaqif-e-hayaat

insaan ko us se pahle na koi shu'ur thaa

· · ·

kahkashaan 'ishq ki hai be-sar-o-paa mere baa'd

baam par chaand munavvar na huaa mere baa'd

kaafir-e-husn musalmaan na huaa mere baa'd

kalima-e-'ishq kisi ne na paDhaa mere baa'd

· · ·

nafsi-nafsi kaa hai 'aalam sab hue naa-aashnaa

mahshar-e-zo'm-e-khirad mein kaun kis kaa aashnaa

main ne bhi baad-e-sabaa ke haath ko bose diye

lams-e-gesu se tire dast-e-sabaa thaa aashnaa

· · ·

vo aadmi jo dard kaa haamil nahin rahaa

kaif-e-gham-e-hayaat use haasil nahin rahaa

pahlaa saa ab vo rang-e-mahaafil nahin rahaa

us shokh kaa koi mutabaadil nahin rahaa

· · ·

khulq se duur rahaa jo vo misaali na huaa

us ko haasil kabhi e'zaaz zaraa bhi na huaa

nai tahzib kaa parvarda nigaar-e-bebaak

baa-hayaaon mein kabhi shaan-e-tajalli na huaa

· · ·

sab hasinon se ghalat-fahmi kaa tufaan niklaa

vo sar-e-bazm-e-nigaaraan jo numaayaan niklaa

mere ash'aar ko me'yaar kaa e'zaaz milaa

jaan-e-jaan meraa sukhan-fahm-o-sukhan-daan niklaa

· · ·