Ghazal

yuun to har gaam pe Thokar koi khaa jaataa huun

phir bhi ye azm miraa hai ki chalaa jaataa huun

baarhaa aise savaalaat ne taDpaayaa hai

main bhi kyaa un ke khayaalaat pe chhaa jaataa huun

· · ·

alam aah-o-fughaan aansu gile bechaargi le kar

tumhaare paas aaya huun main apni zindagi le kar

chaman se ek kaanTaa aur ik naazuk kali le kar

taqaabul kar rahaa huun zindagi se zindagi le kar

· · ·

ishq mein itnaa asar ho ye zaruri to nahin

un ko ab meri khabar ho ye zaruri to nahin

gaamzan huun main jahaan josh-e-junun mein ai dost

vo tiri raahguzar ho ye zaruri to nahin

· · ·

na apni kahnaa na meri sunnaa koi sunegaa to kyaa kahegaa

akele ronaa akele hansnaa koi sunegaa to kyaa kahegaa

Dhalak ke qadmon pe aa ke girnaa ye haalat-e-be-khudi mein aanchal

khayaal itnaa bhi ab na rakhnaa koi sunegaa to kyaa kahegaa

· · ·

pahlu mein main dabaae hue dard-o-gham uThaa

mahfil se teri jab bhi uThaa chashm-e-nam uThaa

Thokar se gard-e-raah aDi rahnumaa bani

manzil ki samt jab bhi hamaaraa qadam uThaa

· · ·

qayaamat se nahin kam us pe aa jaanaa mire dil kaa

bahut mushkil hai ab aasaan honaa meri mushkil kaa

nigaah-e-yaas ne kyaa kah diyaa qaatil se maqtal mein

taDaptaa hai jo khanjar kaanptaa hai haath qaatil kaa

· · ·

dil se kisi ki yaad bhulaane chalaa thaa main

jaltaa huaa charaagh bujhaane chalaa thaa main

sharminda huun ye kah ke ulaT dijiye naqaab

mahshar se pahle hashr uThaane chalaa thaa main

· · ·

apne ghar se vo mire ghar aa gayaa

chaand aakhir had ke baahar aa gayaa

khat pahunch saktaa hai ab ummid hai

us kaa patthar meri chhat par aa gayaa

· · ·

tu jaantaa hai tire jaan-nisaar hain ham log

rah-e-vafaa mein magar sangsaar hain ham log

hamaare azm hain milon ke pattharon ki tarah

tiraa nishaan tiri rahguzaar hain ham log

· · ·