ishq mein ain hunar-mandi hai — Abdul Majeed Hairat

sub.h ye fikr ki ho jaa.e shaam
shaam ko ye ki sahar ho jaa.e

— Abdul Majeed Hairat

sach to ye hai ki nadaamat hi hui
raaz ki baat kisi se kah ke

— Abdul Majeed Hairat

koi khush ho ki khafaa ho 'hairat'
ham to har baat khari kahte hain

— Abdul Majeed Hairat

bahr-e-bimaar davaa hai na duaa
kyaa ise chaaragari kahte hain

— Abdul Majeed Hairat

'hairat' ke gham-kade mein khushi kaa guzar kahaan
aap aa gae to raunaq-e-kaashaana ho gai

— Abdul Majeed Hairat

ye shabaab-e-husn ye husn-e-shabaab
hashr tak un par yahi aalam rahe

— Abdul Majeed Hairat

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

husn jalva dikhaa gayaa apnaa
ishq baiThaa rahaa udaas kahin

— Saifuddin Saif

dil-e-haris hi apnaa na ho sakaa qaane
vagarna tere karam mein to kuchh kami na rahi

— Soz Hoshiarpuri