nasib us ke sharaab-e-bahisht hove mudaam — Abdul Rahman Ehsan Dehlvi

namaaz apni agarche kabhi qazaa na hui
adaa kisi ki jo dekhi to phir adaa na hui

— Abdul Rahman Ehsan Dehlvi

gale se lagte hi jitne gile the bhuul gae
vagarna yaad thiin ham ko shikaayatein kyaa kyaa

— Abdul Rahman Ehsan Dehlvi

dil-rubaa tujh saa jo dil lene mein ayyaari kare
phir koi dilli mein kyaa dil ki khabardaari kare

— Abdul Rahman Ehsan Dehlvi

aag is dil-lagi ko lag jaae
dil-lagi aag phir lagaane lagi

— Abdul Rahman Ehsan Dehlvi

ba-vaqt-e-bosa-e-lab kaash ye dil kaamraan hotaa
zabaan us bad-zabaan ki munh mein aur main zabaan hotaa

— Abdul Rahman Ehsan Dehlvi

mai-kade mein ishq ke kuchh sarsari jaanaa nahin
kaasa-e-sar ko yahaan gardish hai paimaane ki tarah

— Abdul Rahman Ehsan Dehlvi

na tum hosh mein ho na ham hosh mein hain
chalo mai-kade mein vahin baat hogi

— Bashir Badr

sau fasaad ek ishq mein uTThe
boyaa ik tukhm uge hazaar darakht

— Imdad Ali Bahr

kisi ke zakhm par chaahat se paTTi kaun baandhegaa
agar bahnein nahin hongi to raakhi kaun baandhegaa

— Munawwar Rana

aae kuchh abr kuchh sharaab aae
is ke baa'd aae jo azaab aae

— Faiz Ahmad Faiz

mujh tak kab un ki bazm mein aataa thaa daur-e-jaam
saaqi ne kuchh milaa na diyaa ho sharaab mein

— Mirza Ghalib

zindagi zor hai ravaani kaa
kyaa thamegaa bahaav paani kaa

— Abdul Hamid Adam