aankh lagne na paai sahar ho gai — Adil Zaidi

vaar pusht par karke kyaa milaa tumhein aakhir
ek pal mein kho baiThe e'tibaar jitnaa thaa

— Adil Zaidi

apne rasm-o-rivaaj kho baiThe
baaqi ab khaandaan mein kyaa hai

— Adil Zaidi

ye sahn-e-arz-e-haram hai ba-ehtiyaat qadam
bahut qarib khudaa hai zaraa sanbhal ke chalo

— Adil Zaidi

ghaTaaein khul ke barsin thiin chaDhe the dil ke dariyaa bhi
chaDhe dariyaaon kaa ik din utarnaa bhi zaruri thaa

— Adil Zaidi

jab bhi aankh lage main dekhun ek suhaani surat
devi thi vo ruup ki raani yaa patthar ki murat

— Adil Zaidi

vo jis se meri zaat mein bikhri thi raushni
vo khvaab vo khayaal vo paikar nahin rahaa

— Adil Zaidi

kam-umri mein sunet hain
mar jaate hain achchhe log

— Malikzada Javed

baDe qalaq ki baat hai ki tum ise na paDh sake
hamaari zindagi to ik khuli hui kitaab thi

— Nazim Sultanpuri

umr bhar kaun nibhaataa hai ta'alluq itnaa
ai miri jaan ke dushman tujhe allaah rakkhe

— Ahmad Faraz

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

— Irfan Sattar

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

— Arshad Jamal Sarim

apne man mein Duub kar paa jaa suraagh-e-zindagi
tu agar meraa nahin bantaa na ban apnaa to ban

— Allama Iqbal