muddat ke baa'd aaina kal saamne paDaa — Ahmad Wasi

vo kare baat to har lafz se khushbu aae
aisi boli vahi bole jise urdu aae

thak ke yuun pichhle pahar sau gayaa meraa ehsaas
raat bhar shahr mein aavaara phiraa ho jaise

judaai kyuun dilon ko aur bhi nazdik laati hai
bichhaD kar kyuun ziyaada pyaar kaa ehsaas hotaa hai

log hairat se mujhe dekh rahe hain aise
mere chehre pe koi naam likhaa ho jaise

jo kahtaa thaa zamin ko main sitaaron se sajaa dungaa
vahi basti ki tah mein rakh gayaa chingaariyaan apni

muddat guzar gai hai ki dil ko sukun nahin
muddat guzar gai hai kisi kaa bhalaa kiye