hai meraa chehra saikaDon chehron kaa aaina — Ahmad Ziya

ik main huun ki lahron ki tarah chain nahin hai
ik vo hai ki khaamosh samundar ki tarah hai

— Ahmad Ziya

basti basti parbat parbat vahshat ki hai dhuup 'ziyaa'
chaaron jaanib viraani hai dil kaa ik viraana kyaa

— Ahmad Ziya

mujh ko mire vajud se koi nikaal de
tang aa chukaa huun roz ke in haadson se main

— Ahmad Ziya

is qadar pur-khulus lahja hai
us se milnaa hai umr bhar jaise

— Ahmad Ziya

nagar nagar mein nai bastiyaan basaai gaiin
hazaar chaahaa magar phir bhi apnaa ghar na banaa

— Ahmad Ziya

aandhiyon ki zad mein hai meraa vajud
aur main divaar ki tasvir huun

— Ahmad Ziya

ret par ik nishaan hai shaayad
ye hamaaraa makaan hai shaayad

— Muzaffar Abdali

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

— Irfan Sattar

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

— Aabid Adeeb

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi