main takiye par sitaare bo rahaa huun — Aitbar Sajid

abhi rail ke safar mein hain bahut nihaal donon
kahin rog ban na jaae yahi saath do ghaDi kaa

— Aitbar Sajid

kisi ko saal-e-nau ki kyaa mubaarakbaad di jaae
calender ke badalne se muqaddar kab badaltaa hai

— Aitbar Sajid

ab to khud apni zarurat bhi nahin hai ham ko
vo bhi din the ki kabhi teri zarurat ham the

— Aitbar Sajid

ek hi shahr mein rahnaa hai magar milnaa nahin
dekhte hain ye aziyyat bhi gavaara kar ke

— Aitbar Sajid

guftugu der se jaari hai natije ke baghair
ik nai baat nikal aati hai har baat ke saath

— Aitbar Sajid

phuul the rang the lamhon ki sabaahat ham the
aise zinda the ki jiine ki alaamat ham the

— Aitbar Sajid

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi

meri chaadar to chhini thi shaam ki tanhaai mein
be-ridaai ko miri phir de gayaa tashhir kaun

— Parveen Shakir

aao tum hi karo masihaai
ab bahalti nahin hai tanhaai

— Muneer Niyazi

tanhaa rahne mein bhi koi uzr nahin hai
lekin us ke saath hi tanhaa rah saktaa huun

— Zafar Iqbal

kis ko fursat thi ki 'akhtar' dekhtaa meri taraf
main jahaan jis bazm mein jab tak rahaa tanhaa rahaa

— Akhtar Saeed Khan

tum se mile to khud se ziyaada
tum ko akelaa paayaa ham ne

— Irfan Siddiqi