Birthday

ishrat-e-haal-e-nau mubaarak ho
aap ko saal-e-nau mubaarak ho

yahi vo din the jab ik dusre ko paayaa thaa
hamaari saal-girah Thiik ab ke maah mein hai

kyaa isi bhuul ko kahte hain mohabbat kaa zavaal
ab mujhe yaad nahin saalgirah bhi teri

baar-e-khaatir hi agar hai to inaayat kiije
aap ko husn mubaarak ho miraa dil mujh ko

do-shaala shaal kashmiri amiron ko mubaarak ho
galim-e-kohna mein jaaDaa faqiron kaa basar hogaa

maan ki duaa na baap ki shafqat kaa saayaa hai
aaj apne saath apnaa janam din manaayaa hai

saalgirah par kitni nek tamannaaein mausul huiin
lekin in mein ek mubaarakbaad abhi tak baaqi hai

farishta hai to taqaddus tujhe mubaarak ho
ham aadmi hain to aib-o-hunar bhi rakhte hain

'shuur' aap kaa pyaar aap ko mubaarak ho
ye pyaar kaa nahin PR kaa zamaana hai

aaj yaaron ko mubaarak ho ki subh-e-eid hai
raag hai mai hai chaman hai dilrubaa hai diid hai

chaand bannaa tumhein mubaarak ho
ghar hamaaraa karoge kab raushan

tu khudaa hai to bajaa mujh ko Daraataa kyuun hai
jaa mubaarak ho tujhe tere karam kaa saaya

ahl-e-gham tum ko mubaarak ho fanaa-aamaadgi
lekin isaar-e-mohabbat jaan de denaa nahin

huzur aap takalluf mein kyon paDe hue hain
mare huon ke janam-din nahin manaataa koi

tumhaari saalgirah par yahi du'aa hai tumhein
falak pe jitne sitaare hon utni khushiyaan milein

jab vasl kaa aaegaa tire saath sanam din
us din ko haqiqat mein kahungaa main janam-din

ghiraa huaa huun janam-din se is taaaqub mein
zamin aage hai aur aasmaan mire pichhe

mehndi mire lahu ki mubaarak ho aap ko
rang-e-hinaa hai is mein aur bu-e-vafaa bhi hai

ab mujh se sambhalti nahin ye dard ki saughaat
le tujh ko mubaarak ho sambhaal apni ye duniyaa

khizaan ki rut hai janam-din hai aur dhuaan aur phuul
havaa bikher gai mom-battiyaan aur phuul