khaak huun lekin saraapaa nuur hai meraa vajud — Anwar Sadeed

khuli zabaan to zarf un kaa ho gayaa zaahir
hazaar bhed chhupaa rakkhe the khamoshi mein

— Anwar Sadeed

jaagti aankh se jo khvaab thaa dekhaa 'anvar'
us ki taabir mujhe dil ke jalaane se mili

— Anwar Sadeed

pankh hilaa kar shaam gai hai is aangan se
ab utregi raat anokhi yaadon vaali

— Anwar Sadeed

chalaa main jaanib-e-manzil to ye huaa maalum
yaqin gumaan mein gum hai gumaan hai poshida

— Anwar Sadeed

sail-e-zamaan mein Duub gae mashhur-e-zamaana log
vaqt ke munsif ne kab rakkhaa qaaem un kaa naam

— Anwar Sadeed

shikva kiyaa zamaane kaa to us ne ye kahaa
jis haal mein ho zinda raho aur khush raho

— Anwar Sadeed

ret par ik nishaan hai shaayad
ye hamaaraa makaan hai shaayad

— Muzaffar Abdali

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

— Allama Iqbal

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

— Aabid Adeeb