phailti jaa rahi hai ye duniyaa — Arshad Lateef

ajab kashish hai tire hone yaa na hone mein
gumaan ne mujh ko haqiqat se baandh rakkhaa hai

khalaa kaa masala hi mukhtalif hai
samundar is qadar gahraa nahin hai

sabhi taabir us ki likh rahe hain
kisi ne bhi use dekhaa nahin hai

jab main us aadmi se duur huaa
gham miri zindagi se duur huaa

kis ke savaal par ye dil rotaa hai saari saari raat
kaun habib hai miraa tere khayaal ke sivaa

koi to moajaza aisaa bhi ho apni mohabbat mein
tire inkaar se iqraar ki surat nikal aae