jazb-e-nigaah-e-shoabada-gar dekhte rahe — Arzoo Lakhnavi

khizaan kaa bhes banaa kar bahaar ne maaraa
mujhe do-rangi-e-lail-o-nahaar ne maaraa

phir chaahe to na aanaa o aan baan vaale
jhuTaa hi vaada kar le sachchi zabaan vaale

hasraton kaa dil se qabza uTh gayaa
ghaasibon ki hukmraani khatm hai

khamoshi meri maani-khez thi ai aarzu kitni
ki jis ne jaisaa chaahaa vaisaa afsaana banaa Daalaa

shauq chaDhti dhuup jaataa vaqt ghaTti chhaanv hai
baa-vafaa jo aaj hain kal be-vafaa ho jaaeinge

aap apne se barhami kaisi
main nahin koi aur hai ye bhi