Bewafa

us bevafā ne ham ko agar apne ishq meñ
rusvā kiyā ḳharāb kiyā phir kisī ko kyā

chalā thā zikr zamāne kī bevafā.ī kā
so aa gayā hai tumhārā ḳhayāl vaise hī

lo phir tire laboñ pe usī bevafā kā zikr
ahmad 'farāz' tujh se kahā na bahut huā

us ke yuuñ tark-e-mohabbat kā sabab hogā koī
jī nahīñ ye māntā vo bevafā pahle se thā

us ne mujhe dar-asl kabhī chāhā hī nahīñ thā
ḳhud ko de kar ye bhī dhokā, dekh liyā hai

duniyā ne terī yaad se begāna kar diyā
tujh se bhī dil-fareb haiñ ġham rozgār ke

āshiq huuñ pa māshūq-farebī hai mirā kaam
majnūñ ko burā kahtī hai lailā mire aage

phir usī bevafā pe marte haiñ
phir vahī zindagī hamārī hai

is qadar musalsal thiiñ shiddateñ judā.ī kī
aaj pahlī baar us se maiñ ne bevafā.ī kī

hastī ke mat fareb meñ aa jā.iyo 'asad'
aalam tamām halqa-e-dām-e-ḳhayāl hai

kisī bevafā kī ḳhātir ye junūñ 'farāz' kab tak
jo tumheñ bhulā chukā hai use tum bhī bhuul jaao

bevafā.ī pe terī jī hai fidā
qahr hotā jo bā-vafā hotā

is se pahle ki be-vafā ho jaa.eñ
kyuuñ na ai dost ham judā ho jaa.eñ

mere baa'd vafā kā dhokā aur kisī se mat karnā
gaalī degī duniyā tujh ko sar merā jhuk jā.egā

ahbāb ko de rahā huuñ dhokā
chehre pe ḳhushī sajā rahā huuñ

fareb-e-ārzū kī sahl-añgārī nahīñ jaatī
ham apne dil kī dhaḌkan ko tirī āvāz-e-pā samjhe

haañ vo nahīñ ḳhudā-parast jaao vo bevafā sahī
jis ko ho diin o dil aziiz us kī galī meñ jaa.e kyuuñ

ik ajab haal hai ki ab us ko
yaad karnā bhī bevafā.ī hai

us ke īfā-e-ahd tak na jiye
umr ne ham se bevafā.ī kī

husn thā terā bahut ālam-fareb
ḳhat ke aane par bhī ik aalam rahā