ghar mein bhi nazar aaeinge andaaz-e-bayaabaan — Bismil Aghai

phir gardish-e-dauraan se ulajhnaa nahin mushkil
ghurbat mein jo pindaar-e-tab-o-taab na TuuTe

simTaa tiraa khayaal to dil mein samaa gayaa
phailaa to is qadar ki samundar lagaa mujhe

har samt hai viraani si viraani kaa aalam
ab ghar saa nazar aane lagaa hai miraa ghar bhi

hoti rahi aankhon se jo yuun khuun ki baarish
dil khatm na ho jaae jigar khatm na ho jaae

har nashtar-e-tafriq ne marham kaa kiyaa kaam
toDe gae lekin mire ahbaab na TuuTe