ik ishq kaa gham aafat aur us pe ye dil aafat — Chiragh Hasan Hasrat

aao husn-e-yaar ki baatein karein
zulf ki rukhsaar ki baatein karein

— Chiragh Hasan Hasrat

ghairon se kahaa tum ne ghairon se sunaa tum ne
kuchh ham se kahaa hotaa kuchh ham se sunaa hotaa

— Chiragh Hasan Hasrat

ummid to bandh jaati taskin to ho jaati
vaada na vafaa karte vaada to kiyaa hotaa

— Chiragh Hasan Hasrat

raat ki baat kaa mazkur hi kyaa
chhoDiye raat gai baat gai

— Chiragh Hasan Hasrat

qubul is baargah mein iltijaa koi nahin hoti
ilaahi yaa mujhi ko iltijaa karnaa nahin aataa

— Chiragh Hasan Hasrat

yaa-rab gham-e-hijraan mein itnaa to kiyaa hotaa
jo haath jigar par hai vo dast-e-duaa hotaa

— Chiragh Hasan Hasrat

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

husn jalva dikhaa gayaa apnaa
ishq baiThaa rahaa udaas kahin

— Saifuddin Saif