ham bhuul gae ahd-o-karam tere sitam bhi — Farah Khan

us kaa milnaa hai ajab tarah kaa mujh se milnaa
dasht-e-imkaan mein ho phulon kaa jaise khilnaa

— Farah Khan

mil hi jaaoge mujhe vaqt ki gardish se pare
bas zaraa jism ki divaar giraani hogi

— Farah Khan

nahin nasib mein manzil to raaste kyon hain
tavil-tar ye judaai ke silsile kyon hain

— Farah Khan

is teri mohabbat mein milaa kuchh bhi nahin hai
main jaan gai huun ki sila kuchh bhi nahin hai

— Farah Khan

had-e-imkaan se pare tak main tujhe chaahungi
tu mujhe apne mayassar ki hadon mein milnaa

— Farah Khan

ye khad-o-khaal bhi lagte hain ab paraae se
mujhe dikhaate nahin hain to aaine kyon hain

— Farah Khan

ret par ik nishaan hai shaayad
ye hamaaraa makaan hai shaayad

— Muzaffar Abdali

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

— Aabid Adeeb

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

— Allama Iqbal