use ehsaas honaa chaahiye thaa — Idris Azad

tire rang-o-bu ko bhi dekhte na khayaal thaa na majaal thi
jo sakat mili tujhe dekhne ki to rang-o-bu se nikal gae

— Idris Azad

main ne jitne bhi log dekhe hain
sab ke sinon mein rog dekhe hain

— Idris Azad

khinch laati hai samundar se jazire sar-e-aab
jab miri aankh ko manzar ki tamanna ho jaae

— Idris Azad

itne zaalim na bano kuchh to muravvat sikho
tum pe marte hain to kyaa maar hi Daaloge hamein

— Idris Azad

main to itnaa bhi samajhne se rahaa hon qaasir
raah takne ke sivaa aankh kaa maqsad kyaa hai

— Idris Azad

tum ne taaron ko rahnumaa jaanaa
ham ne taaron ki rahnumaai ki

— Idris Azad

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

umr hi teri guzar jaaegi un ke hal mein
teraa bachcha jo savaalaat liye baiThaa hai

— Hamid Mukhtar Hamid

kal yahi bachche samundar ko muqaabil paaeinge
aaj tairaate hain jo kaaghaz ki nannhi kashtiyaan

— Hasan Akbar Kamal

khilaunon ki dukaanon ki taraf se aap kyuun guzre
ye bachche ki tamannaa hai ye samjhautaa nahin karti

— Munawwar Rana

bach-bach ke teri raah se chalnaa to thaa mujhe
tu jo badal gayaa hai badalnaa to thaa mujhe

— Asad Awan

dil kuchh der machaltaa hai phir yaadon mein yuun kho jaataa hai
jaise koi ziddi bachcha rote rote so jaataa hai

— Azhar Naqvi