main to itnaa bhi samajhne se rahaa hon qaasir — Idris Azad

tire rang-o-bu ko bhi dekhte na khayaal thaa na majaal thi
jo sakat mili tujhe dekhne ki to rang-o-bu se nikal gae

main ne jitne bhi log dekhe hain
sab ke sinon mein rog dekhe hain

khinch laati hai samundar se jazire sar-e-aab
jab miri aankh ko manzar ki tamanna ho jaae

itne zaalim na bano kuchh to muravvat sikho
tum pe marte hain to kyaa maar hi Daaloge hamein

main apne aap se rahtaa huun duur eid ke din
ik ajnabi saa takalluf nae libaas mein hai

tum ne taaron ko rahnumaa jaanaa
ham ne taaron ki rahnumaai ki

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

gunaahon ne mujhe jakDaa huaa hai is tarah 'tanhaa'
ki lahza-bhar ibaadat bhi sazaa maalum hoti hai

zakhm detaa hai har koi 'tanhaa'
hausla bhi diyaa kare koi

hamaari aankhon mein be-vajh aa gae aansu
yaqin kiije kisi baat par nahin aae