ham bhi tire beTe hain zaraa dekh hamein bhi — Khursheed Akbar

ai shahr-e-sitam-zaad tiri umr baDi ho
kuchh aur bataa naql-e-makaani ke alaava

— Khursheed Akbar

aate aate aaegi duniyaa-daari
jaate jaate faaqa-masti jaaegi

— Khursheed Akbar

ghaib kaa aisaa parinda hai zamin par insaan
aasmaanon ko jo shah-par pe uThaae hue hai

— Khursheed Akbar

baDi bholi hai kharchili zarurat
shahanshaahi kamaai maangti hai

— Khursheed Akbar

yahaan to rasm hai zindon ko dafn karne ki
kisi bhi qabr se murda kahaan nikaltaa hai

— Khursheed Akbar

gharibi kaaTnaa aasaan nahin hai
vo saari umr patthar kaaTtaa hai

— Khursheed Akbar

jism-e-aazaadi mein phunki tu ne majburi ki ruuh
khair jo chaahaa kiyaa ab ye bataa ham kyaa karein

— Fani Badayuni

qaatil tiri gali bhi badaun se kam nahin
jis ke qadam qadam pe mazaar-e-shahid hai

— Mushafi Ghulam Hamdani

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

— Ada Jafarey

royaa thaa kaun kaun mujhe kuchh khabar nahin
main us ghaDi vatan se kai miil duur thaa

— Muneer Niyazi

aazaadiyon ke shauq o havas ne hamein 'adil'
ik ajnabi zamin kaa qaidi banaa diyaa

— Adeel Zaidi

chheDti hai mujhe aa aa ke miri aazaadi
go main qaidi huun mire paanv mein zanjir bhi hai

— Kaleem Ahmadabadi