ai shahr-e-sitam-zaad tiri umr baDi ho — Khursheed Akbar

aate aate aaegi duniyaa-daari
jaate jaate faaqa-masti jaaegi

ghaib kaa aisaa parinda hai zamin par insaan
aasmaanon ko jo shah-par pe uThaae hue hai

ham bhi tire beTe hain zaraa dekh hamein bhi
ai khaak-e-vatan tujh se shikaayat nahin karte

baDi bholi hai kharchili zarurat
shahanshaahi kamaai maangti hai

yahaan to rasm hai zindon ko dafn karne ki
kisi bhi qabr se murda kahaan nikaltaa hai

gharibi kaaTnaa aasaan nahin hai
vo saari umr patthar kaaTtaa hai

kam-umri mein sunet hain
mar jaate hain achchhe log

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

ham bahut pachhtaae aavaazon se rishta joD kar
shor ik lamhe kaa thaa aur zindagi bhar kaa sukut

tamaam umr havaa phaankte hue guzri
rahe zamin pe magar khaak kaa mazaa na liyaa

laai hayaat aae qazaa le chali chale
apni khushi na aae na apni khushi chale