mire andar kai ehsaas patthar ho rahe hain — Khushbir Singh Shaad

kuchh talab mein bhi izaafa karti hain mahrumiyaan
pyaas kaa ehsaas baDh jaataa hai sahraa dekh kar

ragon mein zahr-e-khamoshi utarne se zaraa pahle
bahut taDpi koi aavaaz marne se zaraa pahle

kabhi uruuj pe thaa khud pe e'timaad miraa
ghurub kaise huaa hai ye aaftaab na puchh

reza reza kar diyaa jis ne mire ehsaas ko
kis qadar hairaan hai vo mujh ko yakjaa dekh kar

bahut dinon se mire baam-o-dar kaa hissa hai
miri tarah ye udaasi bhi ghar kaa hissa hai

zaraa ye dhuup Dhal jaae to un kaa haal puchheinge
yahaan kuchh saae apne aap ko paikar bataate hain