ragon mein zahr-e-khamoshi utarne se zaraa pahle — Khushbir Singh Shaad

bhanvar jab bhi kisi majbur kashti ko Dubotaa hai
to apni bebasi par duur se saahil taDaptaa hai

ye teraa taaj nahin hai hamaari pagDi hai
ye sar ke saath hi utregi sar kaa hissa hai

'shaad' itni baDh gai hain mere dil ki vahshatein
ab junun mein dasht aur ghar ek jaise ho gae

yahi qatre banaate hain kabhi to ghaas par moti
kabhi shabnam ko ye simaab mein tabdil karte hain

rafta rafta sab tasvirein dhundli hone lagti hain
kitne chehre ek puraane album mein mar jaate hain

ab andheron mein jo ham khauf-zada baiThe hain
kyaa kahein khud hi charaaghon ko bujhaa baiThe hain

main baDaa ho gayaa huun magar bachpanaa
mere dil se kabhi bhi gayaa hi nahin

chehre ko tere dekh ke khaamosh ho gayaa
aisaa nahin savaal tiraa laa-javaab thaa

kah rahaa hai shor-e-dariyaa se samundar kaa sukut
jis kaa jitnaa zarf hai utnaa hi vo khaamosh hai

kahtaa hai bahut kuchh vo mujhe chupke hi chupke
zaahir mein ye kahtaa hai ki main kuchh nahin kahtaa

nazar un ki rahi college ke bas ilmi favaaed par
giraa ke chupke chupke bijliyaan diini aqaaed par

baaton ne us ki ham ko khaamosh kar diyaa hai
aage zabaan thi lekin ab gosh kar diyaa