divaar-e-khvaab mein koi dar kar nahin sake — Mahender Kumar Sani

darakht-e-zard mein jaise haraa saa rahtaa hai
vo Thiik usi tarah mujhi mein bharaa saa rahtaa hai

— Mahender Kumar Sani

raushni mein lafz ke tahlil ho jaane se qabl
ik khalaa paDtaa hai jis mein ghumtaa rahtaa huun main

— Mahender Kumar Sani

raat din gardish mein hain lekin paDaa rahtaa huun main
kaam kyaa meraa yahaan hai sochtaa rahtaa huun main

— Mahender Kumar Sani

main tanhaai ko apnaa ham-safar kyaa maan baiThaa
mujhe lagtaa hai mere saath duniyaa chal rahi hai

— Mahender Kumar Sani

tujhe raushni se judaa karun kisi shaam main
tujhe itni taab mein dekhnaa nahin ho rahaa

— Mahender Kumar Sani

main apni yaatraa par jaa rahaa huun
mujhe ab lauT kar aanaa nahin hai

— Mahender Kumar Sani

jhaankte raat ke garebaan se
ham ne sau aaftaab dekhe hain

— Salman Akhtar

raushni ho rahi hai kuchh mahsus
kyaa shab aakhir tamaam ko pahunchi

— Aslam Farrukhi

shor din ko nahin sone detaa
shab ko sannaaTaa jagaa detaa hai

— Saifuddin Saif

shab-e-vaada fasil-e-hijr se aage chamaktaa hai tiraa ism-e-sitaara-ju
ki jaise koi paivand-e-ridaa-e-subh aa jaae kisi qindil ki zad mein

— Zahid Masood

shikva-e-zulmat-e-shab se to kahin behtar thaa
apne hisse ki koi shama jalaate jaate

— Ahmad Faraz

ji DhunDtaa hai phir vahi fursat ki raat din
baiThe rahein tasavvur-e-jaanaan kiye hue

— Mirza Ghalib