tujhe raushni se judaa karun kisi shaam main — Mahender Kumar Sani

darakht-e-zard mein jaise haraa saa rahtaa hai
vo Thiik usi tarah mujhi mein bharaa saa rahtaa hai

raushni mein lafz ke tahlil ho jaane se qabl
ik khalaa paDtaa hai jis mein ghumtaa rahtaa huun main

raat din gardish mein hain lekin paDaa rahtaa huun main
kaam kyaa meraa yahaan hai sochtaa rahtaa huun main

main tanhaai ko apnaa ham-safar kyaa maan baiThaa
mujhe lagtaa hai mere saath duniyaa chal rahi hai

divaar-e-khvaab mein koi dar kar nahin sake
ham log shab se aage safar kar nahin sake

main apni yaatraa par jaa rahaa huun
mujhe ab lauT kar aanaa nahin hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maarka garm to ho lene do khun-rezi kaa
pahle shamshir ke niche hamin jaa baiTheinge

ghazal mein jab talak ehsaas ki shiddat na ho shaamil
faqat alfaaz ki kaarigari mahsus hoti hai

gul kiyaa jis ne vo thaa aur magar
shama ne shikva havaaon se kiyaa

sab ke sab mil kar bhi mujh ko zer kar sakte na the
meraa apnaa haath shaamil hai miri paspaai mein

khayaal-e-naaf-e-butaan se ho kyuun ki dil jaan-bar
nikalte koi bhanvar se na Dubtaa dekhaa