mat baiTh aashiyaan mein paron ko sameT kar — Mahfuzur Rahman Adil

tumhaare bakhshe hue aansuon ke qatron se
shab-e-firaaq mein taare sajaa rahaa huun main

usi ne bakhshaa hai mujh ko shuur jiine kaa
jo mushkilon ki ghaDi baar baar aai hai

vo miri aavaaragardi vo miraa divaana-pan
vo miri taazim mein divaar-o-dar kaa jaagnaa

zindagi ko hausla dene ke khaatir
khvaahishon ko reza reza chun rahaa huun

khud mire aansu chamak rakhte hain gauhar ki tarah
meri chashm-e-aarzu mein maah-o-akhtar kuchh nahin

ek din vo zarron ko aaftaab kar leinge
dhuup ke jo khvaahaan hain raat ke andhere mein

zindagi phaili hui thi shaam-e-hijraan ki tarah
kis ko itnaa hausla thaa kaun ji kar dekhtaa

tumhaare baa'd khudaa jaane kyaa huaa dil ko
kisi se rabt baDhaane kaa hausla na huaa

zinda rahne kaa haq milegaa use
jis mein marne kaa hausla hogaa

ye aur baat ki kam-hausla to main bhi thi
magar ye sach hai use pahle main ne chaahaa thaa

tamaam umr azaabon kaa silsila to rahaa
ye kam nahin hamein jiine kaa hausla to rahaa

tohmat si liye phirte hain sadiyon se sar apne
rusvaa hai bahut naam yahaan ahl-e-hunar kaa