chaand ke husn ki tasvir banaane vaale — Mazhar Abbas

niklaa zabaan se jhuuT jo sach ke libaas mein
baDh ke sabhi ne ham ko gale se lagaa liyaa

vo chaand hai to aks bhi paani mein aaegaa
kirdaar khud ubhar ke kahaani mein aaegaa

meri to por por mein khushbu si bas gai
us par tiraa khayaal hai aur chaand-raat hai

chaahiye thi aap ki tasvir so
khinch li tasvir main ne chaand ki

jab adhure chaand ki parchhaain paani par paDi
raushni ik naa-mukammal si kahaani par paDi

jali hain dhuup mein shaklein jo maahtaab ki thiin
khinchi hain kaanTon pe jo pattiyaan gulaab ki thiin

saaqi nazar na aae to gardan jhukaa ke dekh
shishe mein maahtaab hai sach boltaa huun main