Shayari Of Iqbal Sajid

mile mujhe bhī agar koī shaam fursat kī
maiñ kyā huuñ kaun huuñ sochūñgā apne baare meñ

ġhurbat kī tez aag pe aksar pakā.ī bhuuk
ḳhush-hāliyoñ ke shahr meñ kyā kuchh nahīñ kiyā

hote hī shaam jalne lagā yaad kā alaao
aañsū sunāne dukh kī kahānī nikal paḌe

ab tū darvāze se apne naam kī taḳhtī utaar
lafz nañge ho ga.e shohrat bhī gaalī ho ga.ī

sūraj huuñ chamakne kā bhī haq chāhiye mujh ko
maiñ kohr meñ lipTā huuñ shafaq chāhiye mujh ko

mire ghar se ziyāda duur sahrā bhī nahīñ lekin
udāsī naam hī letī nahīñ bāhar nikalne kā

'sājid' tū phir se ḳhāna-e-dil meñ talāsh kar
mumkin hai koī yaad purānī nikal paḌe

ye tire ash.ār terī ma.anavī aulād haiñ
apne bachche bechnā 'iqbāl-sājid' chhoḌ de

maiñ ḳhuun bahā kar bhī huā baaġh meñ rusvā
us gul ne magar kaam pasīne se nikālā

darvesh nazar aatā thā har haal meñ lekin
'sājid' ne libās itnā bhī saada nahīñ pahnā

musalsal jāgne ke baa'd ḳhvāhish ruuTh jaatī hai
chalan sīkhā hai bachche kī tarah us ne machalne kā

pyāso raho na dasht meñ bārish ke muntazir
maaro zamīñ pe paañv ki paanī nikal paḌe