ham ko bhi kyaa kyaa maze ki daastaanein yaad thiin — Mirza Hadi Ruswa

hans ke kahtaa hai musavvir se vo ghaarat-gar-e-hosh
jaisi surat hai miri vaisi hi tasvir bhi ho

— Mirza Hadi Ruswa

baad tauba ke bhi hai dil mein ye hasrat baaqi
de ke qasmein koi ik jaam pilaa de ham ko

— Mirza Hadi Ruswa

usi par munhasir thi zindagi kyaa
ghaTaa jaataa hai dam zabt-e-fughaan se

— Mirza Hadi Ruswa

apne surat-gar se puchhun main agar maqdur ho
kyaa banaayaa thaa mujhe tu ne miTaane ke liye

— Mirza Hadi Ruswa

dekhaa hai mujhe apni khushaamad mein jo masruf
is but ko ye dhokaa hai ki islaam yahi hai

— Mirza Hadi Ruswa

Talnaa thaa mere paas se ai kaahili tujhe
kam-bakht tu to aa ke yahin Dher ho gai

— Mirza Hadi Ruswa

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

husn jalva dikhaa gayaa apnaa
ishq baiThaa rahaa udaas kahin

— Saifuddin Saif