mahak uThi hai fazaa pairahan ki khushbu se — Mohammad Asadullah

rahbar bhi ye hamdam bhi ye gham-khvaar hamaare
ustaad ye qaumon ke hain meamaar hamaare

— Mohammad Asadullah

ik dandanaati rail si umrein guzar gaiin
do pTriyon ke beach vahi faasle rahe

— Mohammad Asadullah

ai jaate baras tujh ko saunpaa khudaa ko
mubaarak mubaarak nayaa saal sab ko

— Mohammad Asadullah

aab-dida huun main khud zakhm-e-jigar se apne
teri aankhon mein chhupaa dard kahaan se dekhun

— Mohammad Asadullah

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

us ke munh pe mukar gayaa thaa dil
aaj had se guzar gayaa thaa dil

— Divyansh Rawat

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

— Nida Fazli

main badalte hue haalaat mein Dhal jaataa huun
dekhne vaale adaakaar samajhte hain mujhe

— Shahid Zaki