yaqinan rahbar-e-manzil kahin par raastaa bhulaa — Nisar Itavi

ye dil vaalon se puchho is ko dil vaale samajhte hain
bigaaD aai havaa zulfein kisi ki yaa sanvaar aai

— Nisar Itavi

kitne pur-haul andheron se guzar kar ai dost
ham tire husn ki rakhshanda sahar tak pahunche

— Nisar Itavi

aa dost saath aa dar-e-maazi se maang laaein
vo apni zindagi ki javaan bhi hasin bhi thi

— Nisar Itavi

dil mein kyaa kyaa gumaan guzarte hain
muskuraao na baat se pahle

— Nisar Itavi

afsos kisi se miT na saki insaan ke dil ki tishna-labi
shabnam hai ki royaa karti hai baadal hain ki barsaa karte hain

— Nisar Itavi

subh bichhaD kar shaam kaa vaada shaam kaa honaa sahal nahin
un ki tamannaa phir kar lenaa subh ko pahle shaam karo

— Nisar Itavi

uThaa hi laayaa sabhi raaste vo kaandhon par
yaqin us pe na kartaa to main kidhar jaataa

— Sadiq

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

idhar to tuul diyaa hai umiid ko us ne
udhar hayaat ataa ki hai mukhtasar mujh ko

— Kaifi Chirayyakoti

bahut ummid thi manzil pe jaa kar chain paaeinge
magar manzil pe jab pahunche to nazm-e-kaarvaan badlaa

— Salam Sandelvi

insaan ki niyyat kaa bharosa nahin koi
milte ho to is baat ko imkaan mein rakhnaa

— Anjum Khaleeq

koshish bhi kar umiid bhi rakh raasta bhi chun
phir is ke baa'd thoDaa muqaddar talaash kar

— Nida Fazli