aa dost saath aa dar-e-maazi se maang laaein — Nisar Itavi

yaqinan rahbar-e-manzil kahin par raastaa bhulaa
vagarna qaafile ke qaafile gum ho nahin sakte

dil mein kyaa kyaa gumaan guzarte hain
muskuraao na baat se pahle

afsos kisi se miT na saki insaan ke dil ki tishna-labi
shabnam hai ki royaa karti hai baadal hain ki barsaa karte hain

mausam-e-gul hai baadal chhaae khanak rahe hain paimaane
kaisi tauba, tauba tauba, tauba nazr-e-jaam karo

shauq kitne fareb detaa hai
muskuraa kar hamaaraa naam na le

kitne pur-haul andheron se guzar kar ai dost
ham tire husn ki rakhshanda sahar tak pahunche

kam-umri mein sunet hain
mar jaate hain achchhe log

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

adaa huaa na qarz aur vajud khatm ho gayaa
main zindagi kaa dete dete suud khatm ho gayaa

ai shahr-e-sitam-zaad tiri umr baDi ho
kuchh aur bataa naql-e-makaani ke alaava

umr bhar tujh ko dekhne par bhi
zauq-e-nazzaara kam nahin hotaa