zeb detaa hai use itnaa taghaaful mujh se — Noman Badr

main kaaTaa jaaungaa sab ko 'aziz hote hue
saDak ke biich mein aayaa huaa darakht huun main

— Noman Badr

ye lamha jis mein ham aaj chhup kar gale mile hain
agar muqaddar nahin milaa to sazaa banegaa

— Noman Badr

ham ko khushiyaan bhi udaasi ke lifaafe mein milin
ham saa bad-bakht zamaane mein nahin hai koi

— Noman Badr

lafz-e-ehsaas ko tasvir nahin kar sakte
'ishq duniyaa ki zabaanon se baDaa hai shaayad

— Noman Badr

ghol ke ghol mire sahn mein aa baiThte hain
ye parinde mujhe hijrat nahin karne dete

— Noman Badr

hamaare baa'd bhi tum qahqahe lagaate ho
tumhaare baa'd to ham baat bhi nahin karte

— Noman Badr

ye jafaaon ki sazaa hai ki tamaashaai hai tu
ye vafaaon ki sazaa hai ki pae-daar huun main

— Hamid Mukhtar Hamid

apni kashti kaa hai khudaa haafiz
pichhe tufaan hai saamne girdaab

— Meer Mehdi Majrooh

is qadar musalsal thiin shiddatein judaai ki
aaj pahli baar us se main ne bevafaai ki

— Ahmad Faraz

taazgi hai sukhan-e-kuhna mein ye baad-e-vafaat
log aksar mire jiine kaa gumaan rakhte hain

— Imam Bakhsh Nasikh

mere baa'd vafaa kaa dhokaa aur kisi se mat karnaa
gaali degi duniyaa tujh ko sar meraa jhuk jaaegaa

— Qateel Shifai

kuchh to majburiyaan rahi hongi
yuun koi bevafaa nahin hotaa

— Bashir Badr