kyaa ho sake hisaab ki jab aagahi kahe — Qasim Yaqub

dar-e-imkaan ki dastak mujhe bheji gai hai
meri qismat mein to maujud ki daulat nahin hai

ye kyaa ki baiThaa hai dariyaa kinaar-e-dariyaa par
main aaj bahtaa huaa jaa rahaa huun paani mein

ye jhaank leti hai andar se aarzu-khaana
havaa kaa qad miri divaar se ziyaada hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

safar mein aise kai marhale bhi aate hain
har ek moD pe kuchh log chhuT jaate hain

yuun to maujud apne ghar mein hai
aadmi mustaqil safar mein hai

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

ik dasht-e-be-amaan kaa safar hai chale-chalo
rukne mein jaan o dil kaa zarar hai chale-chalo

raah-e-talab ki laakh masaafat giraan sahi
duniyaa ko main jahaan bhi milaa taaza-dam milaa