gham-e-hayaat se itni bhi hai kahaan fursat — Rifat Sultan

umr bhar tujh ko dekhne par bhi
zauq-e-nazzaara kam nahin hotaa

— Rifat Sultan

dil mein koi khushi nahin lekin
aadatan muskuraa rahaa huun main

— Rifat Sultan

tu miri baat kaa javaab na de
main samajhtaa huun khaamushi ki zabaan

— Rifat Sultan

mujhe bhi yuun to baDi aarzu hai jiine ki
magar savaal ye hai kis tarah jiyaa jaae

— Rifat Sultan

ab is maqaam pe laai hai zindagi mujh ko
ki chaahtaa huun tujhe bhi bhulaa diyaa jaae

— Rifat Sultan

jaltaa rahaa huun ziist ke dozakh mein umr bhar
ye aur baat hai miri koi khataa nahin

— Rifat Sultan

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi

husn jalva dikhaa gayaa apnaa
ishq baiThaa rahaa udaas kahin

— Saifuddin Saif