meri miTTi mein koi aag si lag jaati hai — Salim Saleem

main ghaTtaa jaa rahaa huun apne andar
tumhein itnaa ziyaada kar liyaa hai

is dil mein chubhaa rahtaa thaa kaanTe ki tarah vo
ik roz use main ne mohabbat se nikaalaa

kitne bekaar khudaaon ki ibaadat ki hai
aakhiri baar kisi but se shikaayat ki hai

aa rahaa hogaa vo daaman se havaa baandhe hue
aaj khushbu ko pareshaan kiyaa jaaegaa

charaagh-e-ishq badan se lagaa thaa kuchh aisaa
main bujh ke rah gayaa us ko havaa banaane mein

sunaa hai chaand ko uljhaa liyaa hai shaakhon ne
so ab charaagh darichon pe rakh diye jaaein