aarzu hasrat aur ummid shikaayat aansu — Sarwar Alam Raz

kam-ayaari ne khudaa-soz banaayaa aisaa
but to sab yaad rahe ek khudaa bhuul gae

— Sarwar Alam Raz

shauq hai tujh ko zamaane mein tiraa naam rahe
aur mujhe Dar hai mohabbat miri bad-naam na ho

— Sarwar Alam Raz

tu ne kab ishq mein achchhaa buraa sochaa 'sarvar'
kaise mumkin hai ki teraa buraa anjaam na ho

— Sarwar Alam Raz

dekh ye jazb-e-mohabbat kaa karishma to nahin
kal jo tere dil mein thaa vo aaj mere dil mein hai

— Sarwar Alam Raz

bayaan qissa-e-bechaargi kiyaa jaae
jo dil ki rah gai dil mein use kahaa jaae

— Sarwar Alam Raz

be-kaif javaani hai be-dard zamaana hai
naakaam-e-mohabbat kaa itnaa hi fasaana hai

— Sarwar Alam Raz

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi

husn jalva dikhaa gayaa apnaa
ishq baiThaa rahaa udaas kahin

— Saifuddin Saif