bus mujhe be-vafaa keh dijiye mar jaaungi — Shabeena Adeeb

mujhe dekhnaa hai kis se miraa shahr hogaa raushan
vo makaan jalaa rahe hain main diye jalaa rahi huun

— Shabeena Adeeb

raat din aap charaaghon ko jalaate kyon hain
ghar charaaghon se nahin pyaar se raushan hogaa

— Shabeena Adeeb

haal kyaa dil kaa hai izhaar se raushan hogaa
yaa'ni kirdaar to kirdaar se raushan hogaa

— Shabeena Adeeb

zindagi phaili hui thi shaam-e-hijraan ki tarah
kis ko itnaa hausla thaa kaun ji kar dekhtaa

— Ahmad Faraz

havaa khafaa thi magar itni sang-dil bhi na thi
hamin ko shama jalaane kaa hausla na huaa

— Qaisarul Jafri

tumhaare baa'd khudaa jaane kyaa huaa dil ko
kisi se rabt baDhaane kaa hausla na huaa

— Saifuddin Saif

al-madad ai jazba-e-zauq-e-mohabbat al-madad
ishq ne aavaaz di be-ikhtiyaaraana mujhe

— Sohail Azeemabadi

ye aur baat ki kam-hausla to main bhi thi
magar ye sach hai use pahle main ne chaahaa thaa

— Ishrat Afreen

dasht-e-junun ki khaak uDaane vaalon ki himmat dekho
TuuT chuke hain andar se lekin man-maani baaqi hai

— Kumar Pashi