har ashk-e-surkh hai daamaan-e-shab mein aag kaa phuul — Siraj Lakhnavi

sajda-e-ishq pe tanqid na kar ai vaaiz
dekh maathe pe abhi chaand numaayaan hogaa

— Siraj Lakhnavi

na mohtasib ki khushaamad na mai-kade kaa tavaaf
khudi mein mast huun apni bahaar mein gum huun

— Siraj Lakhnavi

qafas bhi bigDi hui shakl hai nasheman ki
ye ghar jo phir se sanvar jaae aashiyaan ho jaae

— Siraj Lakhnavi

abhi rakkhaa rahne do taaq par yunhi aaftaab kaa aaina
ki abhi to meri nigaah mein vahi meraa maah-e-tamaam hai

— Siraj Lakhnavi

charaagh sajda jalaa ke dekho hai but-kada dafn zer-e-kaaba
hudud-e-islaam hi ke andar ye sarhad-e-kaafiri milegi

— Siraj Lakhnavi

Takraaun kyuun zamaane se kyaa faaeda 'siraaj'
khud apne raaste se haTaa jaa rahaa huun main

— Siraj Lakhnavi

jhaankte raat ke garebaan se
ham ne sau aaftaab dekhe hain

— Salman Akhtar

raushni ho rahi hai kuchh mahsus
kyaa shab aakhir tamaam ko pahunchi

— Aslam Farrukhi

shor din ko nahin sone detaa
shab ko sannaaTaa jagaa detaa hai

— Saifuddin Saif

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

— Irfan Sattar

shab-e-vaada fasil-e-hijr se aage chamaktaa hai tiraa ism-e-sitaara-ju
ki jaise koi paivand-e-ridaa-e-subh aa jaae kisi qindil ki zad mein

— Zahid Masood

dil mein na ho jurat to mohabbat nahin milti
khairaat mein itni baDi daulat nahin milti

— Nida Fazli