Anjum Ansari

anjaane khvaab ki khaatir kyuun chain ganvaayaa

انجانے خواب کی خاطر کیوں چین گنوایا کب وقت کا پنچھی ٹھیرا کب سایہ ہاتھ میں آیا اک نور کی چادر سمٹی بے جان فضا دھندلائی گھر آئے گھنیرے بادل یا چاند گہن میں آیا آنکھوں سے نشیلی شب کی دھوتی رہی شبنم کاجل ہر سمت سیاہی پھیلی ہر سمت اندھیرا چھایا جو بات لبوں پر آئی وہ بات بنی افسانہ اک گیت کو اس دنیا نے کتنی ہی دھنوں میں گایا دل درد سے بھر بھر آیا پلکوں پہ نہ چمکے آنسو آنکھوں نے سمندر بھر کے قطرے کے لیے ترسایا ایسے بھی زمانے گزرے دن سویا راتیں جاگیں احساس کا رنگیں آنچل سناٹوں میں لہرایا خوشیوں کو تو چھوڑا ہم نے اک کھیل سمجھ کر انجمؔ جس غم کو رگ جاں سمجھا اس غم نے ہمیں ٹھکرایا

baagh mein rah ke bahaaron ko nibhaanaa hogaa

باغ میں رہ کے بہاروں کو نبھانا ہوگا اپنی روٹھی ہوئی خوشیوں کو منانا ہوگا توڑنا ہوگا چھلکتے ہوئے ساغر کا غرور بن پئے بزم کو اب رنگ پہ آنا ہوگا ڈھالنی ہوگی اسی رات کے دامن سے سحر ٹوٹے تاروں کو ضیا بار بنانا ہوگا تھامنی ہوں جو تجھے وقت کی نبضیں ہمدم اڑتے لمحوں پہ کوئی نقش جمانا ہوگا ان چراغوں میں بھڑک اٹھے ہیں شعلے انجمؔ اپنی راتوں میں دیا اور جلانا ہوگا

banaae sab ne isi khaak se diye apne

بنائے سب نے اسی خاک سے دیے اپنے فلک سے ٹوٹ کے شمس و قمر نہیں آئے گلی گلی ہو جہاں جنتوں کا گہوارہ ہماری راہ میں ایسے نگر نہیں آئے ہر ایک موڑ سے پوچھا ہے منزلوں کا پتہ سفر تمام ہوا رہبر نہیں آئے غموں کے بوجھ سے ٹوٹی ہے زندگی کی کمر بدن پہ زخم کہیں چارہ گر نہیں آئے گلوں کی آنچ نے جھلسا دیا بہاروں کو چمن کو لوٹنے برق و شرر نہیں آئے ہوئے ہیں سینۂ شب میں جو دفن افسانے لب سحر پہ کبھی بھول کر نہیں آئے چمک اٹھے ہیں تھپیڑوں کی چوٹ سے قطرے صدف کی گود میں انجمؔ گہر نہیں آئے

parchhaaiyon ke shahr zamin par basaa diye

پرچھائیوں کے شہر زمیں پر بسا دیئے بدلی ہٹا کے چاند نے جنگل سجا دیئے کتنے ہی دائروں میں بٹا مرکز خیال اک بت کے ہم نے سیکڑوں پیکر بنا دیئے ٹوٹے کسی طرح تو فضاؤں کا یہ جمود آندھی رکی تو ہم نے نشیمن جلا دیئے اب راستوں کی گرد سے اٹتے نہیں بدن نقش قدم اسیر گل تر بنا دیئے اک چاند کی تلاش میں گھومے نگر نگر لوٹے تو آسماں نے ستارے بجھا دیئے بازی تو ہم نے آج بھی ہاری نہیں حضور نظریں بچا کے آپ نے مہرے اٹھا دیئے ٹھہری ہوئی ہوا میں بھڑکتے نہیں چراغ جھونکوں نے لو بڑھائی دیئے جگمگا دیئے انجمؔ لبوں میں جذب ہوئیں تلخیاں تمام مرجھا گئی بہار جو ہم مسکرا دیئے