har ek moD se puchhaa hai manzilon kaa pata — Anjum Ansari

chamak uThe hain thapeDon ki choT se qatre
sadaf ki god mein 'anjum' guhar nahin aae

kitne hi daaeron mein baTaa markaz-e-khayaal
ik but ke ham ne saikaDon paikar banaa diye

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa