حال ہوا جب پوچھنے آئی ہم مجبوروں سے کوئی بات کہاں بن پائی ہم مجبوروں سے آج سبھی دکھ آنسو بن کر آنکھ میں تیر گئے کھیل رہی تھی کھیل خدائی ہم مجبوروں سے وہ بے پردہ وہ بے پروا وہ یک سر یک تال بات کرے یا وہ ہرجائی ہم مجبوروں سے پاؤں توڑ کے بیٹھ رہے ہیں راہ کے پتھر بھی چاہ رہے تھے راہ نمائی ہم مجبوروں سے کس آہٹ کی بہار سے پگ پگ دھول کے پھول کھلے کس موسم نے ٹھوکر کھائی ہم مجبوروں سے کس کے لمس کے عکس نما ہیں خوشبو کے جھونکے پوچھ نہ بیٹھے گل صحرائی ہم مجبوروں سے بال نچوڑ کے جھٹکے کس نے دکھ کے دل بادل پوچھ رہی ہے یہ پروائی ہم مجبوروں سے درد کے رخ دروازے رکھیں چاند کے رخ کھڑکی کاش کرائے وہ چنوائی ہم مجبوروں سے کار نمو آغاز رہے گا گور ہو یا گلشن رت نے سیکھی گل آرائی ہم مجبوروں سے آنکھیں ہونٹوں کے تالے بھی کھلتے دیکھیں گی دنیا چھین تو لے گویائی ہم مجبوروں سے راہ دکھانے والے کس دن کس پل آ پہنچیں کب چھن جائے یہ بینائی ہم مجبوروں سے نور چراغ طاق تغافل دل تاریک نہ کر بول کچھ اے ماہ یکتائی ہم مجبوروں سے زہر پیالہ پی لو خالدؔ سلگ اٹھو خالدؔ کیا کیا کہتی تھی شہنائی ہم مجبوروں سے

haal havaa jab puchhne aai ham majburon se

غزل · Ghazal

بات سے بات نکلنے کے وسیلے نہ رہے لب رسیلے نہ رہے نین نشیلے نہ رہے اشک برسے تو دروں خانۂ جاں سیل گیا درد چمکا تو در و بام بھی گیلے نہ رہے پھول سے باس جدا فکر سے احساس جدا فرد سے ٹوٹ گئے فرد قبیلے نہ رہے ٹیس اٹھتی ہے مگر چیخ نہیں ہو پاتی تیرے پھینکے ہوئے پتھر بھی نکیلے نہ رہے موت نے چھین لیا رنگ بھی نم بھی خالدؔ آنکھ بھی سوکھ گئی ہونٹ بھی نیلے نہ رہے

baat se baat nikalne ke vasile na rahe

غزل · Ghazal

اک گام سر راہ سپاس آئی نہ دنیا دریوزۂ عقبیٰ تھا سو راس آئی نہ دنیا محروم رہی صحبت مردان رضا سے کس حسن کی دہشت تھی کہ پاس آئی نہ دنیا ناچی ہے برہنہ سر بازار ہمیشہ اک بار تہ تار لباس آئی نہ دنیا اے راندۂ دنیا تجھے کیا غم کہ مجھ ایسے پروردۂ دنیا کو بھی راس آئی نہ دنیا خالدؔ افق خاک رہا رنگ میں غلطاں مجھ تک کبھی لے کر تری باس آئی نہ دنیا

ik gaam sar-e-raah-e-sipaah aai na duniyaa

غزل · Ghazal

پھر وہی مہرباں ہوا آئی اے مری بے چراغ تنہائی بین کرنے لگیں نہ سناٹے پاسداران گوش و گوپائی کس نے توفیق سے سوا پایا دل نے غم آنکھ نے نمی پائی عشق کا اجر ہے دل رسوا پارسائی عذاب دانائی یہ اسی شہر کے منارے ہیں اے تحیر سرشت بینائی! چار جانب وہی دھندلکے ہیں گمرہو! پھر وہی گلی آئی نا سپاسوں میں با وقار نہ بن اے مری بے وقار گویائی

phir vahi mehrbaan huaa aai

غزل · Ghazal

کس بات پہ گر گئے نظر سے پوچھے تو صدف صف گہر سے اے دشت نورد دل پلٹ بھی اے خاک بہ سر نکل بھی گھر سے ہم غرق جمال کیا بتائیں کس آن گزر گیا وہ سر سے ہر چند غبار راہ تھے ہم نکلے نہ حصار رہ گزر سے دستک کی طرح جو ابھرے خالدؔ کس دھن میں پلٹ گئے تھے در سے

kis baat pe gir gae nazar se

غزل · Ghazal

غم فراہم ہیں مگر ان کی فراوانی نہیں اے گراں جانی یہاں کوئی بھی آسانی نہیں چار سو اک برف بستہ عہد نم کا راج ہے دھوپ میں حدت نہیں دریاؤں میں پانی نہیں یاد ہے کیا کام ہے اس شہر کا کیا نام ہے سب کچھ اس جیسا ہے لیکن آسماں دھانی نہیں زندگی کے دکھ ازل سے زندگی کے ساتھ ہیں لوگ فانی ہیں مگر لوگوں کے دکھ فانی نہیں زندگی بھر صرف اسے پوجا مگر گھر بیٹھ کر پاسداران وفا کا کام دربانی نہیں اک شجر کے کوئی دو پتے بھی اک جیسے نہ تھے میری دنیا میں کسی شے کا کوئی ثانی نہیں

gham faraaham hain magar un ki faraavaani nahin

See all 28 Ghazals →

Similar Poets