Munawwr Badayuni

jo dil ko de gai ik dard umr-bhar ke liye
taDap rahaa huun abhi tak main us nazar ke liye

pichhe muD muD kar na dekho ai 'munavaar' baDh chalo
shahr mein ahbaab to kam hain sage bhaai bahut

ab kunj-e-lahad mein huun mayassar nahin aansu
aayaa hai shab-e-hijr kaa ronaa mire aage

'munavaar' main ne jab dil par nazar ki
munavvar ik charaagh-e-tur dekhaa

nazar aati hain su-e-asmaan kabhi bijliyaan kabhi aandhiyaan
kahin jal na jaae ye aashiyaan kahin uD na jaaein ye chaar par

ilaaj ki nahin haajat dil-o-jigar ke liye
bas ik nazar tiri kaafi hai umr-bhar ke liye