ridaa us chaman ki uDaa le gai — Muneer Niyazi

"bas ek maah-e-junun-khez ki ziyaa ke sivaa nagar mein kuchh nahin baaqi rahaa havaa ke sivaa hai ek aur bhi surat kahin miri hi tarah ik aur shahr bhi hai qarya-e-sadaa ke sivaa ik aur samt bhi hai us se jaa ke milne ki nishaan aur bhi hai ek nishaan-e-paa ke sivaa zavaal-e-asr hai kuufe mein aur gadaagar hain khulaa nahin koi dar baab-e-iltijaa ke sivaa makaan-e-zar lab-e-goyaa had-e-sipahr-o-zamin dikhaai detaa hai sab kuchh yahaan khudaa ke sivaa miri hi khvaahishein baais hain mere gham ki 'munir' azaab mujh pe nahin harf-e-muddaaa ke sivaa"

"rangon ki vahshaton kaa tamaashaa thi baam-e-shaam taari thaa har makaan pe jalaal-e-davaam-e-shaam guldasta-e-jihaat thaa nairang-e-raah-e-ishq thaa ik tilism-e-husn-e-khayaabaan-e-daam-e-shaam aage ki manzilon ki taraf shaam kaa safar jaise shabon ke dil mein thaa shahr-e-qayaam-e-shaam baandhe hue hain vaqt sabhi us ke hukm mein hai jis khudaa ke haath mein kaar-e-nizaam-e-shaam dhundlaa gai hai shaam shab-e-khaam se 'munir' khaali huaa kashish ki sharaabon se jaam-e-shaam"

"shahr parbat bahr-o-bar ko chhoDtaa jaataa huun main ik tamaashaa ho rahaa hai dekhtaa jaataa huun main hosh uDtaa jaa rahaa hai garmi-e-raftaar mein dekhtaa jaataa huun main aur bhultaa jaataa huun main abr hai aflaak par aur ik saraasima qamar ek dasht-e-raaegaan mein dauDtaa jaataa huun main huun makaan mein band jaise imtihaan mein aadmi sakhti-e-divaar-o-dar hai jheltaa jaataa huun main nam hai mere she'r se us chashm-e-sang-aalud mein khvaab huun us chashm-e-tar mein phailtaa jaataa huun main shauq hain kuchh jin ke pichhe chal rahaa huun main 'munir' ranj hain kuchh dil mein mere khinchtaa jaataa huun main"

"nil-e-falak ke ism mein naqsh-e-asir ke sabab hairat hai aab-o-khaak mein maah-e-munir ke sabab ban mein alaahidgi si hai us ke jamaal-e-sabz se daaim fazaa firaaq ki shajar-e-pir ke sabab vusat-e-shahr-e-tang-dil sarmaa ki subh-e-sard mein jaagi hai Dar ke khvaab se surat-e-faqir ke sabab sahn-e-makaan mein shal hai dast-e-duaa-e-aagahi dil mein hai shauq-e-be-hisaab had ki lakir ke sabab zakhm-e-vajud ki davaa bas vahi aakhiri sadaa zinda huun jis ke shauq mein sabr-e-kabir ke sabab sehr hai maut mein 'munir' jaise hai sehr-e-aaina saari kashish hai chiiz mein apni nazir ke sabab"

"makaan mein qaid-e-sadaa ki dahshat makaan se baahar khalaa ki dahshat havaa hai khauf-e-khudaa se khaali hai is nagar mein balaa ki dahshat ghiraa huaa huun main har taraf se hai aaine mein havaa ki dahshat zamin pe har samt hadd-e-aakhir falak pe laa-intihaa ki dahshat shajar ke saae mein maut dekho samar mein us ke fanaa ki dahshat"

"ghairon se mil ke hi sahi be-baak to huaa baare vo shokh pahle se chaalaak to huaa ji khush huaa hai girte makaanon ko dekh kar ye shahr khauf-e-khud se jigar-chaak to huaa ye to huaa ki aadmi pahunchaa hai maah tak kuchh bhi huaa vo vaaqif-e-aflaak to huaa kuchh aur vo huaa na huaa mujh ko dekh kar yaad-e-bahaar-e-husn se ghamnaak to huaa is kashmakash mein ham bhi thake to hain ai 'munir' shahr-e-khudaa sitam se magar paak to huaa"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"